தமிழகத்தில் 2026 சட்டமன்றத் தேர்தலுக்கான அரசியல் களம் தற்போதே அனல் பறக்கத் தொடங்கியுள்ளது. ஆளும் திமுக தலைமையிலான கூட்டணியை வீழ்த்த, தேசிய ஜனநாயகக் கூட்டணியை (NDA) பலப்படுத்தும் முயற்சியில் டெல்லி பாஜக தலைமை தீவிரமாக இறங்கியுள்ளது. இதன் ஒரு பகுதியாக, கடந்த வாரம் திருச்சிக்கு வருகை தந்த ஒன்றிய உள்துறை அமைச்சர் அமித் ஷா, தமிழக அரசியலில் நிலவும் இழுபறிகளை முடிவுக்குக் கொண்டு வர பல்வேறு கட்டப் பேச்சுவார்த்தைகளை நடத்தினார். அப்போது, அதிமுக பொதுச்செயலாளர் எடப்பாடி பழனிசாமி தரப்பிடம், பிரிந்துள்ள ஓபிஎஸ் மற்றும் டிடிவி தினகரன் ஆகியோரை ஒன்றிணைக்க வேண்டும் என்றும், தேமுதிக மற்றும் பாமகவை உள்ளடக்கிய ஒரு வலுவான மெகா கூட்டணியை உருவாக்க வேண்டும் என்றும் வலியுறுத்தப்பட்டது.
இந்த அரசியல் நகர்வுகளின் ஒரு திருப்பமாக, நேற்று சென்னையில் எடப்பாடி பழனிசாமி மற்றும் அன்புமணி ராமதாஸ் ஆகியோர் கூட்டாகச் சந்தித்து, 2026 தேர்தலுக்கான அதிமுக – பாஜக – பாமக கூட்டணி உறுதியாகிவிட்டதாக அதிகாரப்பூர்வமாக அறிவித்தனர். “இது ஒரு வெற்றிக் கூட்டணி” என ஈபிஎஸ் பிரகடனம் செய்துள்ள நிலையில், இந்தக் கூட்டணியை மேலும் வலுப்படுத்தவும், தேர்தல் பிரசாரத்தைத் தொடங்கி வைக்கவும் பிரதமர் நரேந்திர மோடி வரும் ஜனவரி 28-ஆம் தேதி தமிழகம் வர உள்ளார். கன்னியாகுமரி அல்லது திருநெல்வேலி மாவட்டத்தில் நடைபெறும் பிரம்மாண்டமான தேசிய ஜனநாயகக் கூட்டணி பொதுக்கூட்டத்தில் பிரதமர் மோடி பங்கேற்று உரையாற்ற உள்ளதாகத் தகவல்கள் வெளியாகியுள்ளன.
இந்த வரலாற்றுச் சிறப்புமிக்க மேடையில், எடப்பாடி பழனிசாமி, அன்புமணி ராமதாஸ் உள்ளிட்ட கூட்டணிக் கட்சிகளின் அனைத்து முக்கியத் தலைவர்களையும் ஒரே மேடையில் அமர வைக்கப் பாஜக மேலிடம் விரிவான ஏற்பாடுகளைச் செய்து வருகிறது. குறிப்பாக, பிரதமரின் வருகைக்கு முன்பாக, எடப்பாடி பழனிசாமியுடன் ஓபிஎஸ் மற்றும் டிடிவி தினகரன் ஆகியோரை இணைப்பதற்கான சமரச முயற்சிகளில் பாஜகவின் தேர்தல் பொறுப்பாளர்கள் பியூஷ் கோயல் உள்ளிட்டோர் தீவிரமாக ஈடுபட்டு வருகின்றனர். மேலும், தேமுதிக-வையும் இந்தக் கூட்டணியில் இணைப்பதற்கான பேச்சுவார்த்தைகள் இறுதி கட்டத்தை எட்டியுள்ளன. பிரதமரின் இந்த வருகையானது, தமிழகத்தில் மாற்று ஆட்சியை உருவாக்குவதற்கான தொடக்கமாக அமையும் எனத் தொண்டர்கள் மத்தியில் பலத்த எதிர்பார்ப்பு ஏற்பட்டுள்ளது.
