மௌன ராகத்தில் கார்த்திக் கதாபாத்திரம்… முதலில் நான் தான் நடிக்க இருந்தேன் ! – வருத்தப்பட்ட பிரபலம்

சினிமா உலகில் ஒவ்வொரு நடிகருக்கும் கிடைக்கும் வாய்ப்புகள் எல்லாம் அவர்களின் கரங்களில் நிலைத்து நிற்கும் என்பதில்லை. சில நேரங்களில் தவிர்க்கப்படும் கதைகள் பின்னாளில் ஹிட் அடித்து, அந்த வாய்ப்பை தவிர்த்த நடிகர்களுக்கு வருத்தத்தை ஏற்படுத்தும். இவ்விதமாகவே 90களில் பிரபலமான நடிகர் ஆனந்த் ஒரு பேட்டியில் தனது கைமீறி போன வாய்ப்புகள் குறித்து பேசினார்.

தனது நினைவுகளை பகிர்ந்த நடிகர் ஆனந்த், “மௌன ராகம் படத்தில் கார்த்திக் கதாபாத்திரத்திற்கு முதலில் என்னையே தேர்வு செய்திருந்தார்கள். ஆனால் நான் அந்த வாய்ப்பை தவறவிட்டேன். அதற்கு முன்பாக அக்னி நட்சத்திரம் படத்தில் கார்த்தியின் நண்பன் கதாபாத்திரத்தில் நடிக்க வேண்டும் என்று பேசப்பட்டது. ஆனால் சரியாக பொருந்தவில்லை என விலக்கிவிட்டார்கள்,” எனத் தெரிவித்தார்.

மேலும், “ரோஜா படத்திற்கும் என்னை அணுகினார்கள். அப்போது அரவிந்த் சாமியின் பெற்றோரின் உடல்நிலை மோசமாக இருந்ததால், அவரை மாற்றி என்னை முயற்சி செய்தார்கள். ஸ்கில் டெஸ்ட் எடுத்தனர். ஆனால் நான் அந்தக் கதைக்கு ‘செட்’ ஆகவில்லை என கூறி வாய்ப்பை கொடுக்கவில்லை,” என்றார்.

சமீபத்தில் தான், ‘திருடா திருடா’ படம் மூலம் அனைவரின் மனதிலும் இடம் பிடித்த ஆனந்த், மேலும் தெரிவித்ததாவது: “டூயட் படத்தில் ஹீரோவாக நான் தேர்வானேன். ஆனால் சம்பள விவகாரத்தில் முரண்பாடு ஏற்பட்டு, நான் அந்த படத்திலிருந்து விலகினேன். இப்போது அந்த தவறுகள் பற்றி யோசிக்கும்போது வருத்தமாக இருக்கிறது,” என வருத்தப்பட்டு கூறியுள்ளார்.