மயிலாடுதுறை மாவட்டம், தரங்கம்பாடி தாலுகா பகுதிகளில் உள்ள கிறிஸ்தவ ஆலயங்களில் கல்லறைத் திருநாளை முன்னிட்டு சிறப்பு ஆராதனைகள் நடைபெற்றன.
கிறிஸ்தவர்கள் ஆண்டுதோறும் நவம்பர் 2-ம் தேதியை கல்லறைத் திருநாளாக அனுசரித்து வருகின்றனர். இதையொட்டி தங்கள் முன்னோர்களின் கல்லறைகளை மலர்களால் அலங்கரித்து, மெழுகுவர்த்தி ஏற்றி, மாலை அணிவித்து, மலர் தூவி இறந்த உறவினர்களை நினைவு கூர்ந்து பிரார்த்தனை செய்தனர்.
இதன் ஒரு பகுதியாக தரங்கம்பாடி தூய ஜென்மாலை அன்னை ஆலயம், எடுத்துக்கட்டி சாத்தனூர் ஆரோக்கிய அன்னை ஆலயங்களில் பங்குத்தந்தை அருளானந்தர் தலைமையில் சிறப்பு கூட்டுப் பிரார்த்தனை நடைபெற்றது. அதேபோல் தரங்கம்பாடியில் உள்ள டிஇஎல்சி புதிய ஜெருசலம் ஆலயம், சிஎஸ்ஐ ஆலயங்கள் மற்றும் பொறையார் பெத்தலகேம் ஆலயத்திலும் சிறப்பு பிரார்த்தனைகள் நடைபெற்றன.
அதைத் தொடர்ந்து பங்குத்தந்தையர்கள் அனைத்து கல்லறைகளுக்கும் புனிதநீர் தெளித்து புனிதம் செய்தனர். இதில் ஏராளமானோர் கலந்து கொண்டு தங்களது முன்னோர்களின் கல்லறைகளை மல்லிகை, ரோஜா, சம்பங்கி உள்ளிட்ட பல்வேறு மலர்களால் அலங்கரித்து, அவர்கள் விரும்பி உண்ணும் உணவுகளை படைத்து, மெழுகுவர்த்தி ஏற்றி மனமுருக பிரார்த்தனை செய்தனர். திருப்பலி மற்றும் இறைவார்த்தை வழிபாடுகளிலும் ஏராளமான கிறிஸ்தவர்கள் பங்கேற்றனர்.
