சென்னை: தி.மு.க.வின் அமைப்பு ரீதியான மாற்றங்களில் ஒரு பகுதியாக, ஒன்றியங்கள் மற்றும் பேரூராட்சிகளை பிரிப்பது தொடர்பாக தலைமை எடுத்துள்ள முடிவுக்கு, பல நிர்வாகிகள் கடும் அதிருப்தி வெளியிட்டுள்ளனர்.
அண்மையில் சட்டசபை தேர்தல்களை முன்னிட்டு, அமைப்பை வலுப்படுத்தும் நோக்கில், அமைப்பு சீர்திருத்தங்களை மேற்கொள்ள முதல்வர் மு.க.ஸ்டாலின் தலைமையில் ஒருங்கிணைப்பு குழு அமைக்கப்பட்டது. இந்த குழு, மாவட்டச் செயலர்கள் மற்றும் பல அணியினர் உட்பட நிர்வாகிகளுடன் ஆலோசனை நடத்தியது.
அதனைத் தொடர்ந்து, இரண்டு அல்லது மூன்று சட்டசபைத் தொகுதிகளுக்கு ஒரு மாவட்ட அமைப்பது, 864 உள்ள ஒன்றியங்களை 1,000 ஆக அதிகரிப்பது போன்ற பரிந்துரைகள் நிறைவேற்றப்பட்டன. தற்போது கரூர், வேலூர், தஞ்சாவூர், சிவகங்கை, அரியலூர், திருவண்ணாமலை உள்ளிட்ட மாவட்டங்களில் புதிய பிரிவுகள் நடைமுறைக்கு வந்துள்ளன.
இந்த மாற்றங்கள், வரும் ஜூன் 1-ம் தேதி மதுரையில் நடைபெறவுள்ள பொதுக்குழுவுக்கு முன், புதிய நிர்வாகிகளை நியமிக்கதற்கான திட்டத்தின் ஒரு பகுதியாக கூறப்படுகிறது.
ஆனால், இந்தத் தீர்மானம், தற்போது உள்ள ஒன்றிய மற்றும் பேரூராட்சி செயலர்களிடம் எதிர்வினையை ஏற்படுத்தியுள்ளது. “இருக்கும் நிலைமைக்கே உரிய மரியாதை கிடைக்கவில்லை. இப்போது பிரிப்பு நடைபெற்றால், எங்கள் பதவிக்கு மதிப்பும் எதிர்கால வாய்ப்புகளும் குறையும்,” என நிர்வாகிகள் சிலர் கருத்து தெரிவித்தனர்.
மேலும், “உள்ளாட்சித் தேர்தல்களில், ஒன்றியச் செயலர்களே முதலில் பரிசீலிக்கப்படுவார்கள். இப்போது பிரிப்பு ஏற்பட்டால் கடும் போட்டி உருவாகும். எனவே, இதுபோன்ற முக்கியமான மாற்றங்களை, நிர்வாகிகளின் கருத்தும் பெறப்பட்ட பிறகே மேற்கொள்ள வேண்டும்,” எனவும் அவர்கள் வலியுறுத்தினர்.
