குத்தாலத்தில் செயல்படும் ஓஎன்ஜிசி கிணற்றை நிரந்தரமாக மூட வலியுறுத்தி பொதுமக்கள் நடவடிக்கை

குத்தாலத்தில் செயல்படும் ஓஎன்ஜிசி கிணற்றை நிரந்தரமாக மூட வலியுறுத்தி பொதுமக்கள், மீத்தேன் திட்ட எதிர்ப்பு கூட்டமைப்பினர் சாலை மறியல் நடத்தியும் மாவட்ட ஆட்சியரிடம் புகார் அளித்தது தொடர்பாக மயிலாடுதுறை கோட்டாட்சியர் அலுவலகத்தில் அமைதி பேச்சு வார்த்தை. பராமரிப்பு பணி மட்டுமே செய்வதாக ஓஎன்ஜிசி விளக்கம். ஏற்க மறுத்த பொதுமக்கள். மாவட்ட ஆட்சியரின் கவனத்திற்கு கொண்டு செல்லப்பட்டு நடவடிக்கை எடுக்கப்படும் என்று அறிவிப்பு:-

மயிலாடுதுறை மாவட்டம் குத்தாலம் ராஜகோபாலபுரத்தில் ஓஎன்ஜிசி நிறுவனத்தின் கைவிடப்பட்ட கிணறான கேயூடி9 என்ற எண்ணெய் எரிவாயு கிணறு அமைந்துள்ளது. கைவிடப்பட்ட இந்த கிணற்றில் மராமத்து பணி (பராமரிப்பு) என்ற பெயரில் துரப்பன பணிகள் மேற்கொள்ளப்படுவதாகவும், இப்பகுதியில் ஒஎன்ஜிசி நிறுவனம் செயல்படுவதால் நிலத்தடி நீரில் எண்ணெய் கலந்து பொதுமக்கள் புற்றுநோய் உள்ளிட்ட பல்வேறு பாதிப்புகளுக்கு ஆளாவதாக குற்றஞ்சாட்டி இந்த கிணற்றை நிரந்தரமாக மூட வேண்டும் என அப்பகுதி மக்கள் தொடர்ந்து வலியுறுத்தி வருகின்றனர். இது தொடர்பாக மயிலாடுதுறை கோட்டாட்சியரிடம் அப்பகுதி மக்கள் புகார் தெரிவித்திருந்த நிலையில் கோட்டாட்சியர் குத்தாலம் ராஜகோபாலபுரத்தில் உள்ள ஓஎன்ஜிசி கிணற்றை நேரில் ஆய்வு செய்தார். உரிய ஆவணங்களின் பேரிலேயே ஓஎன்ஜிசி கிணறு இயங்குவதாக கோட்டாட்சியர் தெரிவித்ததாக கூறப்பட்ட நிலையில் இதனை கண்டித்து அப்பகுதி மக்கள் நூற்றுக்கு மேற்பட்டோர் மயிலாடுதுறை- கும்பகோணம் பிரதான சாலையில் ஓஎன்ஜிசி எதிரில் மீத்தேன் திட்ட எதிர்ப்பு கூட்டமைப்பு ஒருங்கிணைப்பாளர் பேராசிரியர் ஜெயராமன் தலைமையில் கடந்த 29ஆம் தேதி போராட்டத்தில் ஈடுபட்டனர். அதனைத் தொடர்ந்து ஒஎன்ஜிசியின் பணிகள் நிறுத்தப்பட்டது. கிராம மக்கள் மாவட்ட ஆட்சியர் மக்கள் குறைதீர் கூட்டத்தில் மனு அளித்து நடவடிக்கை எடுக்க கோரிக்கை விடுத்தனர். இது தொடர்பாக ஓஎன்ஜிசி நிறுவனம் மற்றும் கிராம மக்களை அழைத்து அமைதி பேச்சுவார்த்தை மயிலாடுதுறை கோட்டாட்சியர் அலுவலகத்தில் நடைபெற்றது. கோட்டாட்சியர் விஷ்ணு பிரியா தலைமையில் குத்தாலம் மயிலாடுதுறை வட்டாட்சியர்கள் காவல்துறையினர் பங்கேற்றனர். கூட்டத்தில் பராமரிப்பு என்ற பெயரில் துளையிடுதல் பிரித்தெடுத்தல் பணிகளை செய்ய அதிக நாட்கள் எடுத்துக் கொள்வதால் ஓஎன்ஜிசி புதிய நடவடிக்கைகளை மேற்கொள்வதாகவும் பள்ளிகள் குடியிருப்புகள் அருகாமையில் இருப்பதால் ஓஎன்ஜிசி நிறுவனம் உடனடியாக வெளியேற வேண்டும் என்று கிராம மக்கள் தரப்பில் தெரிவிக்கப்பட்டது. ஆனால் இதை மறுத்த ஓஎன்ஜிசி நிறுவனம் பராமரிப்பு பணிகள் மட்டுமே நடைபெறுவதாகவும் 30 நாட்களில் முடிக்கப்படும் என்றும், ஓஎன்ஜிசி பணிகளால் மக்களுக்கு பாதிப்பு இல்லை என்றும் மறுப்பு தெரிவித்தனர். இந்த அமைதிப் பேச்சுவார்த்தையில் பொதுமக்களின் கருத்துக்கள், ஓஎன்ஜிசியின் பதில்கள் குறித்து மாவட்ட ஆட்சியரின் கவனத்திற்கு கொண்டு செல்லப்பட்டு நடவடிக்கை எடுக்கப்படும் என்று முடிவு செய்யப்பட்டுள்ளதாக தெரிவிக்கப்பட்டுள்ளது.