உயிருக்கு ஆபத்தான நிலையில் அனுமதிக்கப்பட்ட, கொடிய விஷத்தன்மை உள்ள கட்டு விரியன் பாம்பு கடித்த எட்டாம் வகுப்பு மாணவிக்கு, திருவாரூர் அரசு மருத்துவக் கல்லூரி மருத்துவமனை மருத்துவர்கள் தீவிர சிகிச்சை அளித்து உயிரைக் காப்பாற்றி சாதனை – மருத்துவ கல்லூரி முதல்வர் அசோகன் பெருமிதம்.
நாகப்பட்டினம் மாவட்டம் ஏனங்குடி கிராமத்தை சேர்ந்த செந்தில்குமார் என்பவரது மகள் யாசினி எட்டாம் வகுப்பு படித்து வருகிறார். கடந்த இருபதாம் தேதி நள்ளிரவு வீட்டில் தூங்கிய போது பூச்சி கடித்தது போன்று இருந்துள்ளது. இதனிடையே சிறிது நேரத்தில் வலி தாங்காமல் சிறுமி துடித்துள்ளார். உடனடியாக பார்த்தபோது உடல் வீங்க ஆரம்பித்துள்ளது. இதன் தொடர்ச்சியாக உடனடியாக அருகில் உள்ள நன்னிலம் அரசு மருத்துவமனைக்கு கொண்டு சென்று முதலுதவி அளிக்கப்பட்டுள்ளது. மேல் சிகிச்சைக்காக திருவாரூர் அரசு மருத்துவக் கல்லூரி மருத்துவமனையில் அதிகாலை சிகிச்சைக்காக அனுமதிக்கப்பட்ட நிலையில் சிறுமியை கடித்த பாம்பு கட்டு விரியன் என தெரியவந்ததை தொடர்ந்து உயிருக்கு ஆபத்தான நிலையில் வென்டிலேட்டரில் வைத்து இரண்டு தினங்கள் தீவிர சிகிச்சை அளிக்கப்பட்டது.
மருத்துவர்களின் தீவிர சிகிச்சை காரணமாக சிறுமி ஆபத்தான நிலையிலிருந்து மீண்டு வந்துள்ளார். தற்போது ஆரோக்கியமான நிலையில் சிறுமி மீண்டும் நலமுடன் வீடு திரும்ப உள்ளதாக திருவாரூர் அரசு மருத்துவ கல்லூரி முதல்வர் அசோகன் மற்றும் துறை தலைவர் நடராஜ் ஆகியோர் செய்தியாளர்களிடம் தெரிவித்தனர் .
மேலும் பாம்பு கடிக்காக ஆண்டுதோறும் 50 நபர்கள் அனுமதிக்கப்படும் நிலையில் உடனடியாக சிகிச்சை பெறும் நோயாளிகள் உயிர் காப்பாற்றப்படுவதாகவும், தெரியாத நிலையில் மிகவும் ஆபத்தான நிலையில் அனுமதிக்கப்படும் நபர்களில் ஆண்டுதோறும் மூன்றில் இருந்து நான்கு பேர் வரை உயிரிழப்பதாகவும், பாம்பு கடித்தால் உடனடியாக அரசு மருத்துவமனைகளில் அனைத்து விதமான மருந்துகளும் உள்ளது. எனவே அரசு மருத்துவமனைக்கு உடனடியாக சென்று சிகிச்சை பெற வேண்டுமென தெரிவித்தனர். மேலும் தற்போது டெங்கு பாதிப்பு காரணமாக யாரும் இல்லை எனவும் உண்ணி காய்ச்சல் பாதிக்கப்பட்ட ஒருவர் சிகிச்சை பெற்று நலமுடன் உள்ளதாகவும் தெரிவித்தனர்.
பேட்டி :
- அசோகன் – மருத்துவக் கல்லூரி முதல்வர்.
- மருத்துவர் – நடராஜ் .பொது மருத்துவ துறை தலைவர்.
