மலைகளின் இளவரசியான கொடைக்கானலில், இயற்கை எழில் கொஞ்சும் வில்பட்டி ஊராட்சிக்குட்பட்ட பல்வேறு பகுதிகளில் கட்டிட விதிகளுக்குப் புறம்பாகவும், எவ்வித முறையான அனுமதியின்றியும் விண்ணைத் தொடும் அளவிற்கு ராட்சச கட்டிடங்கள் தொடர்ந்து கட்டப்பட்டு வருவது பெரும் அதிர்ச்சியை ஏற்படுத்தியுள்ளது. இது குறித்து வில்பட்டி ஊராட்சி நிர்வாகம், ஊராட்சி ஒன்றியம் மற்றும் திண்டுக்கல் மாவட்ட நிர்வாகத்திடம் பொதுமக்கள் மற்றும் சமூக ஆர்வலர்கள் பலமுறை ஆதாரங்களுடன் புகார் அளித்தும், சம்பந்தப்பட்ட அதிகாரிகள் இதுவரை எவ்வித நடவடிக்கையும் எடுக்காமல் அலட்சியம் காட்டி வருவதாகக் குற்றச்சாட்டுகள் எழுந்துள்ளன. குறிப்பாக, மலைப்பிரதேசங்களுக்கென வகுக்கப்பட்ட முழுமையான உள்ளூர் திட்டக் குழும (Master Plan) விதிகளைத் துளியும் பின்பற்றாமலும், உயர்நீதிமன்ற மதுரை கிளையின் கண்டிப்பான உத்தரவுகளை மதிக்காமலும் வில்பட்டி ஊராட்சி நிர்வாகம் ஒருதலைப்பட்சமாகச் செயல்பட்டு வருவதாகக் கூறப்படுகிறது. பசுமையான விவசாய நிலங்களை அழித்து அங்கு ராட்சச கட்டிடங்களை எழுப்புவதோடு, சில இடங்களில் பெயரளவில் மட்டும் அனுமதி பெற்றுக்கொண்டு, அனுமதிக்கப்பட்ட அளவை விடப் பல மடங்கு உயரமாக விஸ்வரூபக் கட்டிடங்கள் கட்டப்பட்டு வருகின்றன.
நீதிமன்ற உத்தரவுகளைச் செயல்படுத்தத் தவறிய அதிகாரிகள் மீது சட்டப்படி கடுமையான நடவடிக்கை எடுக்க வேண்டும் என அப்பகுதி மக்களும் விவசாயிகளும் ஒட்டுமொத்தமாகக் கோரிக்கை விடுத்துள்ளனர். இந்த விதிமீறல் கட்டிடங்களால் நிலத்தடி நீர்மட்டம் பாதிக்கப்படுவதோடு, விவசாய நிலங்கள் பெருமளவில் சீரழிக்கப்பட்டு வருகின்றன. மேலும், கட்டிடம் கட்டுபவர்கள் கடினமான பாறைகளை உடைக்கச் சட்டவிரோதமாக அதிநவீன வெடிமருந்துகளைப் பயன்படுத்துவதாகவும், இதனால் அப்பகுதியில் நில அதிர்வுகள் ஏற்பட்டு இயற்கை வளங்கள் சிதைக்கப்படுவதாகவும் அடுக்கடுக்கான புகார்கள் எழுந்துள்ளன. விதிகளை மீறிச் செயல்படும் பெரும் புள்ளிகளுக்கு அதிகாரிகள் உடந்தையாக இருப்பதாகச் சந்தேகிக்கும் பொதுமக்கள், மாவட்ட நிர்வாகமும் உயர்நீதிமன்றமும் உடனடியாக தலையிட்டு இந்த சட்டவிரோதக் கட்டுமானங்களைத் தடுத்து நிறுத்த வேண்டும் என எதிர்பார்க்கின்றனர். இயற்கை வளத்தைச் சிதைக்கும் இத்தகைய ஆக்கிரமிப்புகளை முளையிலேயே கிள்ளி எறியாவிட்டால், வருங்காலத்தில் கொடைக்கானலின் புவியியல் அமைப்பு பெரும் ஆபத்தைச் சந்திக்கும் எனச் சூழலியல் ஆர்வலர்கள் எச்சரிக்கின்றனர்.
