வடகிழக்கு பருவமழை முன்னேற்பாடுகள்: 4 மாவட்ட சுகாதார அலுவலர்களுடன் பொது சுகாதாரம் மற்றும் நோய் தடுப்பு மருந்து துறை இயக்குநர் டாக்டர் சோமசுந்தரம் காணொலி வாயிலாக தீவிர ஆலோசனை :
தமிழகத்தில் வடகிழக்கு பருவமழை தொடங்கவுள்ள நிலையில், பருவக்கால முன்னெச்சரிக்கை மற்றும் தொற்றுநோய் தடுப்பு நடவடிக்கைகள் குறித்த மண்டல அளவிலான ஆலோசனைக் கூட்டம் பொது சுகாதாரம் மற்றும் நோய் தடுப்பு மருந்து துறை இயக்குநர் டாக்டர் சோமசுந்தரம் தலைமையில் நாகப்பட்டினம் மாவட்ட சுகாதார அலுவலர் பிரதீப் வாசுதேவ கிருஷ்ணகுமார் முன்னிலையில்
நாகப்பட்டினம் மாவட்ட சுகாதார அலுவலகத்தில் காணொலிக் காட்சி வாயிலாக நடைபெற்றது.
இக்கூட்டத்தில் நாகப்பட்டினம், மயிலாடுதுறை, திருவாரூர் மற்றும் புதுக்கோட்டை ஆகிய நான்கு மாவட்டங்களைச் சேர்ந்த சுகாதாரப் பணிகள் துணை இயக்குநர்கள், இரண்டாம் நிலை அலுவலர்கள், வட்டார மருத்துவ அலுவலர்கள், நடமாடும் மருத்துவக் குழு மருத்துவர்கள், பள்ளி சிறார் நலத்திட்ட மருத்துவர்கள், வட்டார சுகாதார மேற்பார்வையாளர்கள் மற்றும் சுகாதார ஆய்வாளர்கள் திரளாகப் பங்கேற்றனர்.
கூட்டத்தில் இயக்குநர் டாக்டர் சோமசுந்தரம் பேசுகையில், மழைக்காலங்களில் டெங்கு, மலேரியா உள்ளிட்ட கொசுக்களால் பரவும் நோய்கள் மற்றும் அசுத்தமான குடிநீரால் ஏற்படும் வயிற்றுப்போக்கு போன்ற தொற்றுநோய்கள் பரவாமல் தடுக்க சுகாதாரத் துறையினர் முழு விழிப்புணர்வுடன் தீவிர களப் பணிகளை மேற்கொள்ள வேண்டும் என உத்தரவிட்டார். தாழ்வான பகுதிகளில் தேங்கும் மழைநீரை உடனுக்குடன் அகற்றுதல், கொசு ஒழிப்பு மருந்து அடித்தல் போன்ற பணிகளை உள்ளாட்சி அமைப்புகளுடன் ஒருங்கிணைந்து துரிதமாகச் செயல்படுத்திட அறிவுறுத்தினார்.
அனைத்து அரசு மருத்துவமனைகள் மற்றும் ஆரம்ப சுகாதார நிலையங்களில் காய்ச்சல் கண்காணிப்பு முகாம்களை அதிகப்படுத்த வேண்டும் எனவும், உயிர்காக்கும் அவசர மருந்துகள், நிலவேம்பு குடிநீர் மற்றும் ஓ.ஆர்.எஸ். (ORS) பாக்கெட்டுகளைத் தட்டுப்பாடின்றி போதிய அளவில் கையிருப்பில் வைத்திருக்கவும் உத்தரவிடப்பட்டது.
பொதுமக்களுக்கு விநியோகிக்கப்படும் குடிநீரில் குளோரின் அளவு சரியான விகிதத்தில் உள்ளதா என்பதைத் தொடர்ந்து கண்காணிக்க வேண்டும் என்றும், காய்ச்சல் அல்லது உடல்நலக்குறைவு ஏற்பட்டால் பொதுமக்கள் மருந்தகங்களில் சுயமாக மாத்திரைகள் வாங்கி உட்கொள்ளாமல், உடனடியாக அருகிலுள்ள அரசு மருத்துவமனைகளை அணுகி உரிய சிகிச்சை பெற வேண்டும் என்பது குறித்து தீவிர விழிப்புணர்வு ஏற்படுத்த வேண்டும் என்றும் அதிகாரிகளுக்கு அறிவுறுத்தினார்.
