சென்னை: கிராமங்களில் பொதுமக்கள் நீண்ட காலமாக வசித்து வரும் நத்தம் நிலங்களுக்கு பட்டா பெறும் புதிய மற்றும் எளிமையான முறை ஒன்றை தமிழக அரசு அறிவித்துள்ளது.
‘ஒரே நிமிடத்தில் பட்டா’ என்ற தலைப்பில் அறிமுகப்படுத்தப்பட்ட இந்த திட்டத்தின் மூலம், குறிப்பிட்ட வீட்டு நிலம் பதிவு செய்யப்பட்டவுடனேயே, அதற்கேற்ப பட்டா பெயரும் தானாகவே மாறும். இதற்காக, வழக்கமான நிலங்களைப் போலவே நத்தம் நிலங்களுக்கும் தனி சர்வே எண்கள் வழங்கப்படும். இதன்மூலம், ஒரே சர்வே எண்ணில் இரு விதமான நிலங்கள் இடம்பெறுவது போன்ற குழப்பங்களை தவிர்க்க முடியும் என்று அதிகாரிகள் தெரிவித்துள்ளனர்.
இதுவரை, நத்தம் நிலங்களுக்கு பட்டா பெறுவது ஒரு சிக்கலான செயல்முறையாகவே இருந்து வந்தது. பல தலைமுறைகளாக வசித்துவரும் குடும்பங்களுக்கும் உரிமை உறுதிப்பத்திரம் இல்லாத நிலை தொடர்ந்தது. இந்த நிலையை மாற்றவே, புதிய நடவடிக்கைகள் எடுக்கப்பட்டுள்ளன.
மேலும், பட்டா பெறும் முறைகள் ஆன்லைன் மூலம் எளிமைப்படுத்தப்பட்டுள்ளன. பொதுமக்கள் https://tamilnilam.tn.gov.in/ என்ற இணையதளத்தைப் பயன்படுத்தி தங்கள் நில விவரங்களை மாவட்டம், வட்டம், கிராமம், சர்வே எண் உள்ளிட்ட விவரங்களை உள்ளீடு செய்து அறிந்துகொள்ளலாம்.
இந்நடவடிக்கை, கிராமப்புற மக்களுக்கு மிகுந்த நன்மையை ஏற்படுத்தும். குறிப்பாக, நீண்ட காலமாக பட்டா பெற முடியாமல் இருந்த நத்தம் நில உரிமையாளர்கள் இப்போது எளிதாக அதிகாரப்பூர்வ உரிமையைப் பெற்றுக்கொள்ளலாம். இது சட்ட சிக்கல்களையும் குறைத்து, நில உரிமை தொடர்பான தெளிவை ஏற்படுத்தும் என்று அரசு வட்டாரங்கள் தெரிவித்துள்ளன.
