தமிழகத்தின் பாரம்பரிய அடையாளமான வேட்டியை உலகளாவிய ஃபேஷன் அங்கீகாரமாக மாற்றிய ராம்ராஜ் காட்டன் நிறுவனம், 2026-ஆம் ஆண்டு பொங்கல் பண்டிகையை முன்னிட்டு தனது புகழ்பெற்ற ‘வேட்டி வாரம்’ (Dhoti Week) கொண்டாட்டத்தைத் தொடங்கியுள்ளது. ஜனவரி 1 முதல் 7-ஆம் தேதி வரை நடைபெறும் இந்தச் சிறப்பு வாரத்தை முன்னிட்டு, ஆண்களுக்கும் சிறுவர்களுக்கும் எனப் பிரத்யேகமான வண்ணமயமான வேட்டி-சட்டை தொகுப்புகளை (Combo Sets) அதிரடி சலுகை விலையில் அந்நிறுவனம் அறிமுகம் செய்துள்ளது. தமிழக அரசு ஜனவரி 6-ஆம் தேதியை ‘வேட்டி தினமாக’ அறிவித்ததைத் தொடர்ந்து, கடந்த ஒன்பது ஆண்டுகளாக இந்த விழிப்புணர்வு மற்றும் விற்பனைத் திருவிழாவை ராம்ராஜ் நிறுவனம் வெற்றிகரமாக முன்னெடுத்து வருகிறது.
இந்த ஆண்டின் மையக்கருத்தான ‘கல்ச்சர் கிளப்’ (Culture Club) அடிப்படையில், ஆண்களுக்கு ரூ.995 மதிப்புள்ள வண்ணச் சட்டை மற்றும் மேட்சிங் பார்டர் வேட்டித் தொகுப்பு, வேட்டி வாரச் சலுகையாக ரூ.695 மற்றும் ரூ.595 ஆகிய விலைகளில் விற்பனைக்குக் கொண்டு வரப்பட்டுள்ளது. அதேபோல், சிறுவர்களுக்கான ‘லிட்டில் ஸ்டார்’ (Little Star) தொகுப்புகள் ரூ.795-லிருந்து குறைக்கப்பட்டு, ரூ.395 மற்றும் ரூ.495 ஆகிய சிறப்பு விலைகளில் வழங்கப்படுகின்றன. லாப நோக்கத்தைத் தாண்டி, நெசவாளர்களின் வாழ்வாதாரத்தை மேம்படுத்தவும், இளைய தலைமுறையினரிடையே வேட்டி கட்டும் கலாச்சாரத்தை ஊக்குவிக்கவும் இந்த விலைக்குறைப்புச் சலுகை வழங்கப்படுவதாக நிறுவனம் தெரிவித்துள்ளது.
செய்தியாளர்களிடம் பேசிய ராம்ராஜ் காட்டன் நிறுவனத் தலைவர் கே.ஆர். நாகராஜன், “உணவு உயிரைக் காக்கிறது; நெசவு மானத்தைக் காக்கிறது. உழவர்களையும் நெசவாளர்களையும் வளப்படுத்துவதே எங்களின் நோக்கம். தற்போது இளைஞர்களிடையே வேட்டி அணியும் ஆர்வம் பெருகியுள்ளது என்பதற்குப் பல்வேறு கல்லூரி விழாக்களே சாட்சி. இணையதளம் வழியாக வரும் ஆர்டர்களில் 80 சதவீதம் வெளிநாடுகளில் வாழும் இந்தியர்களிடமிருந்து கிடைக்கிறது. இது வேட்டி ஒரு சர்வதேச அடையாளமாக மாறி வருவதைக் காட்டுகிறது. இந்தப் தேவையைப் பூர்த்தி செய்ய வெளிநாடுகளிலும் புதிய கிளைகளைத் திறக்கத் திட்டமிட்டுள்ளோம்,” என்றார்.
தற்போது பருத்தி விளைச்சல் குறைவால் ஏற்பட்டுள்ள பற்றாக்குறையைச் சமாளிக்க, வெளிநாடுகளில் இருந்து பருத்தியை இறக்குமதி செய்து தடையின்றி உற்பத்தி மேற்கொள்ளப்பட்டு வருகிறது. 4,500-க்கும் மேற்பட்ட வேட்டி ரகங்களை உற்பத்தி செய்யும் ராம்ராஜ், ஒவ்வொரு மாநில கலாச்சாரத்திற்கும் ஏற்பப் புதிய வடிவங்களை உருவாக்கி வருகிறது. இந்த வேட்டி வார அறிமுக நிகழ்வில் நிர்வாக இயக்குநர் பி.ஆர். அருண் ஈஸ்வர், இணை நிர்வாக இயக்குநர் எஸ். அஸ்வின் மற்றும் தலைமைச் செயல் அதிகாரிகள் கலந்துகொண்டனர். இந்தச் சிறப்புச் சலுகை விற்பனை தமிழகத்தில் உள்ள அனைத்து ராம்ராஜ் ஷோரூம்கள் மற்றும் முன்னணி ஜவுளி நிறுவனங்களில் ஜனவரி 7 வரை நடைபெறும் என அறிவிக்கப்பட்டுள்ளது.
