சென்னை: வெற்றிமாறன் மற்றும் அனுராக் காஷ்யப் தயாரிப்பில்,இயக்குனர் வர்ஷா பரத் இயக்கியுள்ள ‘Bad Girl’ திரைப்படம் செப்டம்பர் 5ஆம் தேதி திரையரங்குகளில் வெளியாகிறது.
அஞ்சலி சிவராமன், டீஜே உள்ளிட்டோர் நடித்துள்ள இப்படத்திற்கு அமித் திரிவேதி இசையமைத்துள்ளார். ஜனவரி 26ஆம் தேதி வெளியான டீசர் முதல் இப்படம் பல்வேறு சர்ச்சைகள், விமர்சனங்களை எதிர்கொண்டது. சில அமைப்புகள் தணிக்கை சான்றிதழ் வழங்குவதற்கும் எதிர்ப்பு தெரிவித்தன.
இந்நிலையில், சென்னையில் நடைபெற்ற செய்தியாளர் சந்திப்பில் படக்குழுவினர் கலந்துகொண்டனர். இதில் இயக்குனர் வர்ஷா பரத் பேசியதாவது:
“Bad Girl பட ட்ரெய்லர் வெளியானபோது, பலர் இதை ‘குப்பை படம்’ என்றும், ‘கலாச்சாரத்தை சீரழிக்கிறது’ என்றும் குற்றஞ்சாட்டினர். ஆனால், ரோட்டர்டாம் திரைப்பட விழாவில் படத்தை பார்த்தவர்கள் எழுந்து நின்று கைத்தட்டினர். அது என்னுடைய நம்பிக்கையை அதிகரித்தது.
நம்ம ஊரில் பெண்களையும் மண்ணையும் மதிக்க வேண்டும் என்று பேசுபவர்கள்தான், இந்த படத்தை தயாரித்தவர்களின் வீட்டு பெண்களின் புகைப்படங்களை இணையத்தில் கேவலமாக பகிர்ந்தனர். இதிலிருந்து அவர்களின் உண்மையான நிலைப்பாடு புரிகிறது.
கலாச்சாரத்தை சீரழிக்கிறார்கள் என்று குற்றஞ்சாட்டுபவர்கள் தவறாகப் புரிந்து கொள்கிறார்கள். கலாச்சாரம்தான் பெண்களை காக்க வேண்டும்; பெண்கள் கலாச்சாரத்தை காக்க வேண்டிய அவசியம் இல்லை. கலாச்சாரத்தை காப்பது எங்களுடைய வேலை அல்ல. கடவுளும் கலாச்சாரமும் தான் பெண்களை காக்க வேண்டும்*” என்று அவர் தெரிவித்துள்ளார்.
