பஹல்காம் தாக்குதல் பிந்தைய சூழலில் கவுதம் கம்பீர் கடுமையான கருத்து
ஜம்மு காஷ்மீர் மாநிலத்தின் பஹல்காம் பகுதியில் கடந்த ஏப்ரல் 22-ஆம் தேதி நடைபெற்ற பயங்கரவாத தாக்குதல் இந்தியாவை உலுக்கியது. இந்த தாக்குதலில் 26 பேர் உயிரிழந்தது பெரும் சோகத்தை ஏற்படுத்தியது. இதைத் தொடர்ந்து, இந்தியா – பாகிஸ்தான் இடையேயான உறவுகள் மீண்டும் தீவிர பதற்றத்தைச் சந்தித்துள்ளன.
இந்த சூழலில், “பாகிஸ்தானுடன் எந்தவொரு போட்டியிலும் இந்தியா விளையாடக் கூடாது” எனக் கடுமையாக கருத்து தெரிவித்துள்ளார் இந்திய அணியின் தலைமை பயிற்சியாளரும், முன்னாள் கேப்டனுமான கவுதம் கம்பீர்.
இதுகுறித்து அவர் கூறியதாவது:
“எல்லை தாண்டும் பயங்கரவாதம் முடிவடையும்வரை பாகிஸ்தானுடன் எந்தவொரு வகையிலான போட்டிகளும் நடத்தக் கூடாது. இருநாட்டு உறவுகளில் நிலவும் பதற்றம் காரணமாக, 2007 முதல் இந்தியா, பாகிஸ்தானுடன் முழுமையான தொடரில் விளையாடவில்லை. அவ்வப்போது, உலகக்கோப்பை போன்ற பல்வேறு அணிகள் பங்கேற்கும் போட்டிகளில் மட்டுமே நேரில் மோதுகின்றன. இது கூட நிறுத்தப்பட வேண்டும்” என்றார்.
மேலும், “இந்தியா பாகிஸ்தான் கிரிக்கெட் போட்டிகளோ, பாலிவுட் நிகழ்ச்சிகளோ, பிற கலாச்சார நிகழ்ச்சிகளோ, இந்தியர்களின் உயிரைவிட முக்கியமானவை அல்ல. ஒரு குடும்பம் தனது அன்புக்குரிய ஒருவரை இழப்பது எனும் துயரம் எந்த நிகழ்வாலும் ஈடாக முடியாது” என்று வலியுறுத்தினார்.
இந்திய கிரிக்கெட் வாரியம் (BCCI), பாகிஸ்தான் கிரிக்கெட் வாரியம் மற்றும் ஐசிசி இடையே உள்ள ஒப்பந்தத்தின் படி, 2027 சுழற்சி வரை இந்தியா – பாகிஸ்தான் போட்டிகள் அனைத்தும் நடுநிலையான நாடுகளில் மட்டுமே நடைபெறும் என்பது குறிப்பிடத்தக்கது.
இந்நிலையில், இந்தியா பாகிஸ்தானுடன் ஆசியக் கோப்பை 2025 போட்டியில் விளையாடுமா என்பது அரசாங்கத்தின் முடிவில்தான் உள்ளது எனவும், “அதுவே இறுதி முடிவு, அதை அரசியலாக்கக் கூடாது” எனவும் கவுதம் கம்பீர் தனது கருத்தைத் தெரிவித்துள்ளார்.
