கோல்கத்தா : மேற்கு வங்க மாநிலத்தின் தெற்கு 24 பர்கானாஸ் மாவட்டத்தில் வெடித்த வன்முறை, அரசியல் பரபரப்பை ஏற்படுத்தியுள்ளது. ஒரு கடை கட்டுமானம் தொடர்பான தகராறின் பின்னணியில், அருகிலுள்ள சிவன் கோவிலின் சேதம் வழிவகுத்த இந்த மோதலால், இரண்டு தரப்பினரும் நேருக்கு நேர் மோதியுள்ளனர்.
மோதலின்போது, இருதரப்பினரும் கல்வீச்சில் ஈடுபட்டதுடன், சில வாகனங்கள் தீக்கிரையாக்கப்பட்டதாக கூறப்படுகிறது. சம்பவ இடத்தில் நிலைமை அதிகமாக பாதிக்கப்பட்ட நிலையில், போலீசார் தலையீடு செய்தனர். வன்முறையை கட்டுப்படுத்த கண்ணீர் புகை குண்டுகள் பயன்படுத்தப்பட்டன. மேலும் கோல்கத்தாவிலிருந்து கூடுதல் போலீசார் அழைக்கப்பட்டனர்.
இதற்கிடையில் ஒரு பெண் போலீஸ் கான்ஸ்டபிள் உட்பட பல போலீசார் காயமடைந்துள்ளனர். வன்முறையில் தொடர்புடையதாக சந்தேகத்தின் பேரில் 40 பேர் கைது செய்யப்பட்டுள்ளனர். அவர்கள் மீது விசாரணை நடைபெற்று வருகிறது.
இந்நிலையில், கோல்கத்தா மேயரும் திரிணமூல் காங்கிரஸின் மூத்த தலைவருமான பிர்ஹாத் ஹக்கீம், சமூக வலைதளங்களில் தனது கண்டனத்தை வெளியிட்டுள்ளார். “ஒரு சாதாரண பிரச்னையை வகுப்புவாதமாகவும், அரசியலாகவும் மாற்ற பாஜக முயற்சிக்கிறது என்பதை கடுமையாகக் கண்டிக்கிறோம். மாநிலத்தில் நிலவும் அமைதி மற்றும் நல்லிணக்கத்தை சீர்குலைக்க இது ஒரு திட்டமிட்ட நடவடிக்கையாக இருக்கலாம்,” எனக் குற்றம்சாட்டினார்.
மாநிலத்தில் நிலைமை மீண்டும் சுமுகமாகும் வரை போலீசார் குவிக்கப்பட்டு கண்காணிப்பு தற்சமயம் தொடர்கிறது.
