தேனி மாவட்ட மக்களின் அரை நூற்றாண்டு கால நீண்ட காலக் கனவுத் திட்டமான திண்டுக்கல் – குமுளி ரயில்வே திட்டத்திற்கு மத்திய அரசிடம் போராடி அனுமதி பெற்றுத் தந்த தேனி நாடாளுமன்ற உறுப்பினர் தங்க தமிழ்ச்செல்வன் அவர்களுக்கு, பொதுமக்களின் சார்பில் எழுச்சியான பாராட்டு விழா நடைபெற்றது. கம்பம் அருகே உள்ள கம்பம் புதுப்பட்டி நகர் நலச் சங்கம் மற்றும் அனுமந்தன்பட்டி, கம்பம் புதுப்பட்டி பகுதி பொதுமக்கள் சார்பில், காந்தி சிலை முன்பாக பிரம்மாண்ட மேடை அமைக்கப்பட்டு இந்த விழா மிகச் சிறப்பாக நடத்தப்பட்டது. விழாவிற்கு மாநில ஓய்வு பெற்ற ஆசிரியர் சங்கத் தலைவரும், கம்பம் புதுப்பட்டி நகர் நலச் சங்கத் தலைவருமான க. சுப்பிரமணியன் தலைமை தாங்கி, எம்பி-யின் மக்கள் நலப் பணிகளைப் பாராட்டிப் பேசினார்.
தேனி மாவட்டத்தின் பொருளாதார வளர்ச்சி மற்றும் சுற்றுலாத் துறையை அடுத்த கட்டத்திற்கு எடுத்துச் செல்லக்கூடிய இந்த ரயில்வே திட்டத்திற்காக, தங்க தமிழ்ச்செல்வன் எம்பி அவர்கள் நாடாளுமன்ற அவையில் தொடர்ந்து குரல் கொடுத்ததுடன், உரிய அமைச்சர்களை நேரில் சந்தித்துத் திட்டத்தின் அவசியம் குறித்துப் பலமுறை அழுத்தம் கொடுத்தார். அவரது விடாமுயற்சியின் பலனாகத் தற்போது இந்தத் திட்டத்திற்கான ஆரம்பக்கட்ட அனுமதி கிடைத்துள்ளது. இது குறித்து விழாவில் பேசிய முக்கிய நிர்வாகிகள், மக்களின் நீண்ட காலப் போராட்டத்திற்குப் பிறகு இந்தத் திட்டத்திற்கு உயிர் கொடுத்த தங்க தமிழ்ச்செல்வன் அவர்களின் செயல்பாடு பாராட்டுக்குரியது என்றும், மாவட்டத்தின் உள்கட்டமைப்பை மேம்படுத்துவதில் அவர் காட்டும் ஆர்வம் வியக்கத்தக்கது என்றும் புகழாரம் சூட்டினர்.
இந்த விழாவில், விழா ஒருங்கிணைப்புக் குழுத் தலைவர் மு. சங்கர், சமுதாயத் தலைவர் ஓ.ஆர்.குமரேசன், ஆர்.ஆர். இன்டர்நேஷனல் பள்ளி நிர்வாக இயக்குநர் ஆர்.ராஜாங்கம், தேனி வைகை ஸ்கேன் டாக்டர் டி.பாண்டியராஜ் ஆகியோர் முன்னிலை வகித்தனர். மேலும், திமுக அயலக அணி மாவட்ட அமைப்பாளர் கே.எம்.பில் ரவி, கம்பம் புதுப்பட்டி பேரூராட்சித் தலைவர் சுந்தரி பாஸ்கரன் மற்றும் மூத்த வழக்கறிஞர் துரை நெப்போலியன் உள்ளிட்ட பல முக்கியப் பிரமுகர்கள் கலந்துகொண்டு, நாடாளுமன்றத்தில் மாவட்டத்தின் தேவைகளை உரக்கப் பேசி வரும் எம்பி-யைப் பாராட்டி உரையாற்றினர். நிகழ்ச்சியின் நிறைவாக, பல்வேறு சங்க நிர்வாகிகள் மற்றும் திரளான பொதுமக்கள் வரிசையில் நின்று தங்க தமிழ்ச்செல்வன் எம்பி-க்கு பொன்னாடை போர்த்தித் தங்களது நெஞ்சார்ந்த நன்றியினைத் தெரிவித்துக் கொண்டனர். இந்த விழாவால் கம்பம் மற்றும் சுற்றுவட்டாரப் பகுதிகளில் பெரும் உற்சாகம் நிலவியது.
