மயிலாடுதுறையில் பாதாளசாக்கடை பிரச்சனைக்கு தீர்வு காணாத நகராட்சி நிர்வாகத்தை கண்டித்து மாவட்ட வளர்ச்சி குழு சார்பில் நடைபெற்ற பட்டினி போராட்டத்தில் பேசிய முன்னாள் கவுன்சிலர் 1 கோடி ரூபாய் கமிஷனுக்காக 2007 ஆம் ஆண்டில் செயல்பாட்டுக்கு வந்த பாதாளசாக்கடை திட்டம் தரமான நிறுவனத்திற்கு வழங்கப்படாமல் தரமற்ற நிறுவனத்திற்கு வழங்கப்பட்டதாக குற்றசாட்டு:-
பராமரிப்பு என்ற பெயரில் பலகோடி ஊழல் எனவும் விமர்சனம்:-
மயிலாடுதுறை நகராட்சியில் 36 வார்டுகளில் ஒரு லட்சத்துக்கு மேற்பட்டோர் வசித்து வருகின்றனர். தினந்தோறும் 10 ஆயிரத்திற்கும் மேற்பட்டோர் நகருக்கு வந்து செல்கின்றனர். இங்கு 2007 ஆம் ஆண்டு முதல் நகராட்சியால் செயல்படுத்தப்பட்டு வரும் பாதாள சாக்கடை திட்டம் தரமற்ற முறையில் அமைக்கப்பட்டதால் நகர் முழுவதும் பல்வேறு இடங்களில் ஆழ்நுழைவுத் தொட்டிகள் வழியாக பாதாள சாக்கடை கழிவு நீர் சாலைகளில் வழிந்தோடி கடுமையான சுகாதார சீர்கேட்டை பல வருடங்களாக ஏற்படுத்தி வருகிறது. பாதாளசாக்கடை குழாய் உடைந்து 30க்கும் மேற்பட்ட இடங்களில் சாலைகளில் 20 அடி ஆழத்திற்கு பள்ளம் எற்பட்டு சரிசெய்யப்பட்டுள்ளது. கடந்த திமுக ஆட்சியில் ஆய்வுக்கு வந்த சட்டமன்ற மதிப்பீட்டு குழுவினர் பாதாள சாக்கடை திட்டம் என்ற பெயரில் அரசு பணம் வீணடிக்கப்பட்டுள்ளதாகவும் 100 கோடி மதிப்பீட்டில் பாதாள சாக்கடையை புதிதாக அமைக்க அரசுக்கு பரிந்துரைத்தனர். தொடர்ந்து பாதாள சாக்கடை பராமரிப்பு, விடுபட்ட இடங்களில் புதிதாக பாதாளசாக்கடை திட்டம், குழாய்கள் மாற்றுதல், புதிய கழிவுநீர் சுத்திகரிப்பு நிலையம் அமைப்பதற்கு ரூபாய் 82 கோடி திமுக ஆட்சியில் நிதி ஒதுக்கீடு செய்யப்பட்டு பணிகள் தற்போதும் நடைபெற்று வருகிறது. ஆனாலும் தின்நதோறும் பாதாளசாக்கடை கழிவுநீர் சாலைகளில் வழிந்தோடி வருவது தொடர்கதையாக உள்ளது. இந்நிலையில் இன்று மயிலாடுதுறை மாவட்ட வளர்ச்சி குழு சார்பாக ஒருங்கிணைப்பாளர் பேராசிரியர் முரளிதரன் தலைமையில் நகராட்சி அலுவலகம் முன்பு பட்டினி போராட்டம் நடைபெற்றது. இதில் பல்வேறு கட்சியினர், சேவை சங்கத்தினர், வணிகர்கள் பங்கேற்றனர். சாக்கடை பராமரிப்பு என்ற பெயரில் மிகப்பெரிய ஊழல் நடைபெற்ற உள்ளதாக பேசியவர்கள் குற்றம் சாட்டினர். இதில் பாதாளசாக்கடை திட்டம் நிறைவேற்றியபோது நகர்மன்ற உறுப்பினராக இருந்த பன்னீர்செல்வம் என்பவர் பாதாளசாக்கடை திட்டம் நிறைவேற்றியபோது இருந்த நகராட்சி நிர்வாகத்தையும், மக்கள் பிரதிநிதிகளையும் கடுமையாக விமர்சித்தார். பாதாள சாக்கடை திட்டம் அமைப்பதற்கு ஒரு கோடி ரூபாய்க்கு மேல் கமிஷன் பெற்றதாகவும் கமிஷனுக்காக தரமுற்ற கம்பெனிக்கு பாதாளசாக்கடை பணி வழங்கப்பட்டதாகவும், தரமற்ற முறையில் பணிகள் நடைபெற்றதாகவம் பரபரப்பு குற்றச்சாட்டை முன்வைத்து பேசி பரபரப்பை ஏற்படுத்தினார். மேலும் பன்னீர்செல்வம் நகர்மன்ற உறுப்பினராக இருந்தபோது நகராட்சியில் 6 சதவீதம் வரை இருந்த கமிஷன் கலாச்சாரம் தற்போது 30 சதவீதமாக உயர்ந்துவிட்டதால் புதிதாக போடப்பட்ட சாலைகள் பாழாகிவிடுவதாகவும் சாடினார். கமிஷனுக்காகவே குளங்களை சீரமைப்பதற்கான நிதியை பயன்படுத்துவதாகவும் நகராட்சி பல வகைகளில் ஊழல் செய்துள்ளதாக விமர்சித்தார்.
