சென்னை: தமிழ் சினிமாவின் முன்னணி நடிகர்களில் ஒருவரான தளபதி விஜயின் மகன் சஞ்சய், சினிமா பயணத்தை இயக்குநராகத் தொடங்கியுள்ளார். வெளிநாட்டில் சினிமா படிப்பை முடித்த அவர், தற்போது லைகா புரொடக்ஷன்ஸ் தயாரிப்பில் தனது முதல் திரைப்படத்தை இயக்கி வருகிறார்.
படத்தின் ஹீரோவாக தெலுங்கு மற்றும் தமிழ் சினிமாவில் புகழ் பெற்ற சந்தீப் கிஷன் நடிக்கிறார். இப்படத்தின் முன் தயாரிப்பு பணிகள் கடந்த ஆண்டு தொடங்கி நீண்ட நாட்களாக நடைபெற்றுவந்தன. சந்தீப் கிஷனின் பிறந்தநாளன்று இப்படத்தின் முதல் கிலிம்ப்ஸ் வீடியோ வெளியிடப்பட்டது.
இந்நிலையில், தற்போது இப்படத்தின் பட்ஜெட் குறித்து தகவல்கள் வெளியாகியுள்ளன. விஜய் மகன் சஞ்சய் இயக்கும் இந்த முதல் படத்தின் மொத்த பட்ஜெட் சுமார் ரூ.25 கோடி என கூறப்படுகிறது.
இந்த பட்ஜெட் “first copy” அடிப்படையில் லைகா நிறுவனத்திடம் இருந்து பெறப்பட்டுள்ளது. ‘ஜேசன் சஞ்சய் ஜோசப் மீடியா என்டர்டெயின்மென்ட்ஸ்’ என்ற தனது நிறுவனத்தின் மூலம், சஞ்சய் இப்படத்தின் தயாரிப்பு பணிகளையும் மேற்கொண்டு வருகிறார்.
இதன் மூலம் இயக்குநராக மட்டுமல்லாமல் தயாரிப்பாளராகவும் சஞ்சய் தனது சினிமா பயணத்தை தொடங்குகிறார் என்பது குறிப்பிடத்தக்கது.
