​குத்தாலம் ராஜகோபாலபுரத்தில் உள்ள ஓஎன்ஜிசி எரிவாயுக் கிணறுகளை நிரந்தரமாக மூடக்கோரி மனு

குத்தாலம் ராஜகோபாலபுரத்தில் உள்ள ஓஎன்ஜிசி எரிவாயுக் கிணறுகளை நிரந்தரமாக மூடக்கோரி ஆட்சியரிடம் பொதுமக்கள் மனு அளித்து நடவடிக்கை எடுக்க கோரிக்கை விடுத்துள்ளனர்:-
​
மயிலாடுதுறை மாவட்டம், குத்தாலம் தாலுகா ராஜகோபாலபுரத்தில் குடியிருப்புகள் மற்றும் பள்ளிக்கு மிக அருகாமையில் உள்ள ஓஎன்ஜிசி நிறுவனத்தின் எண்ணெய் மற்றும் எரிவாயுக் கிணறுகளை நிரந்தரமாக மூடக்கோரி அப்பகுதி பொதுமக்கள் மற்றும் சமூகச் செயல்பாட்டாளர்கள் மாவட்ட ஆட்சியர் அலுவலகத்தில் மனு அளித்துள்ளனர்.
​
​ ராஜகோபாலபுரத்தில் ஓஎன்ஜிசியின் கேயுடி-9 உள்ளிட்ட மூன்று கிணறுகள் வீடுகளின் வாசல்களிலும், கொல்லைப்புறத்திலும் மற்றும் பள்ளிக்கூடத்தின் மிக அருகிலும் அமைந்துள்ளன. தற்போது கேயுடி-9
எண்ணெய் கிணறுகளை பராமரிப்பு என்ற பெயரில் துறப்பன பணிகள் மேற்கொள்வதாகவும் கிராம மக்கள் குற்றம் சாட்டியுள்ளனர். இதனால் ஏதேனும் கசிவு அல்லது விபத்து ஏற்பட்டால் பொதுமக்களின் உயிருக்கு ஆபத்து ஏற்படும் அபாயம் உள்ளது.
கடந்த 25 ஆண்டுகளாக இப்பகுதியில் நிலத்தடி நீர் பாழாகி கச்சா எண்ணெய் கலந்தும், உப்புத்தன்மை அதிகரித்தும் பயன்பாட்டிற்கு லாயக்கற்ற நிலைக்கு மாறியுள்ளது.
​நிலத்தடி நீர் மாசுபாட்டால் அப்பகுதியில் புற்றுநோய், தோல் நோய்கள் மற்றும் சிறுநீரக பாதிப்புகள் அதிகரித்து வருவதாக பொதுமக்கள் குற்றம் சாட்டியுள்ளனர்.
​2015-ல் ஏற்பட்ட எரிவாயுக் கசிவு நிகழ்வைச் சுட்டிக்காட்டியுள்ள பொதுமக்கள், மக்களின் உயிர் மற்றும் நிலத்தடி நீரின் பாதுகாப்பைக் கருதி, அங்குள்ள மூன்று எரிவாயுக் கிணறுகளையும் உடனடியாகவும் நிரந்தரமாகவும் மூட அரசு நடவடிக்கை எடுக்க வேண்டும் என வலியுறுத்தியுள்ளனர்.