திருவாரூர் அருகே விவசாய பணி செய்த போது திடீரென அறுந்து விழுந்த உயர் அழுத்த மின்கம்பி – மின்சாரம் தாக்கி இளைஞர் உயிரிழப்பு – காப்பாற்ற முயன்ற தந்தையும் பலியான பரிதாபம்*
திருவாரூர் மாவட்டம் திருநெல்லிக்காவல் புதூர் கிராமத்தைச் சேர்ந்தவர் ராஜா வயது 52. இவர் சொந்தமாக டிராக்டர் வைத்து விவசாய பணிகளை மேற்கொண்டு இவரது 18வயது மகன் ஆதித்யன் டிப்ளமோ முடித்துவிட்டு தந்தைக்கு உதவியாக வேளாண் தொழில் செய்து வருகிறார்.
இன்று காலை விவசாய நிலத்தில் உழவு பணியில் ராஜா ஈடுபட்டு வந்துள்ளார். ராஜா விதை தெளிக்கும் பணியில் ஈடுபட்டிருந்த நிலையில் அவரது மகன் ஆதித்யன் டிராக்டர் கொண்டு நிலத்தை உழுதுள்ளார்.
அப்போது திடீரென விவசாய நிலத்திற்கு மேலே சென்ற உயரழுத்த மின் கம்பி அறுந்து டிராக்டர் மீது விழுந்துள்ளது. இதில் டிராக்டரை இயக்கிக் கொண்டிருந்த ஆதித்யன் மீது மின்சாரம் பாய்ந்து உயிருக்கு போராடி உள்ளார். இதைக் கண்ட அவருடைய தந்தை ராஜா உடனடியாக மகனைக் காப்பாற்றும் முயற்சியில் ஈடுபட்ட போது அவர் மீதும் மின்சாரம் பாய்ந்துள்ளது. இருவரும் விவசாய நிலத்திலேயே துடிதுடித்து பரிதாபமாக உயிரிழந்தனர்.
இருவர் உயிரிழந்த பின்பும் தொடர்ந்து மின்சாரம் டிராக்டர் மீது பாய்ந்துள்ளது இதனால் டிராக்டரின் டயர்கள் எரிந்து சாம்பலாகி உள்ளன. இதனை தொடர்ந்து அங்கிருந்த பொதுமக்கள் மின்சார துறைக்கு தகவல் தெரிவித்து மின்சாரத்தை நிறுத்தி உள்ளனர்.
இதனையடுத்து தகவல் அறிந்து நிகழ்விடத்திற்கு வந்த திருவாரூர் தாலுகா காவல்துறையினர் உடலை கைப்பற்றி பிரேத பரிசோதனைக்காக திருவாரூர் அரசு மருத்துவக் கல்லூரி மருத்துவமனைக்கு அனுப்பி வைத்தனர்.
விவசாய நிலத்தில் தந்தை மகன் இருவரும் மின்சாரம் தாக்கி உயிரிழந்த தகவல் அறிந்து வந்த கிராமத்தினர் மற்றும் உறவினர்கள் கதறி அழத சம்பவம் இப்பகுதியில் பெரும் சோகத்தை ஏற்படுத்தியது.
தண்ணீர் வராமல் ஒருபுறம் விவசாயிகள் மாண்டு கொண்டிருக்கும் நிலையில், மறுபுறம் மின் கம்பி அறுந்து விழுந்ததன் காரணமாக தந்தை மகன் இருவரும் உயிர் இழந்த சம்பவம் டெல்டா விவசாயிகளை வேதனைப்படுத்தியுள்ளது.
