6 தலைமுறையாகச் சாலை இல்லை: அரசு ஆவணங்களைத் திருப்பித் தரக் கிராம மக்கள் முடிவு
திண்டுக்கல் மாவட்டம் நிலக்கோட்டை வட்டம், வத்தலகுண்டு ஊராட்சி ஒன்றியம் விராலிப்பட்டி ஊராட்சிக்கு உட்பட்ட குருநாத நாயக்கனூர் கிராமத்தில் சுமார் 50 குடும்பங்களைச் சேர்ந்த 250-க்கும் மேற்பட்ட மக்கள் வசித்து வருகின்றனர். நாடு சுதந்திரம் அடைந்து பல தசாப்தங்கள் கடந்த நிலையிலும், கடந்த ஆறு தலைமுறைகளாக இந்தக் கிராமத்திற்கு அடிப்படைத் தேவையான சாலை வசதி ஏற்படுத்தித் தரப்படவில்லை.
இதனால் கர்ப்பிணிப் பெண்கள், பள்ளி மாணவர்கள் மற்றும் பொதுமக்கள் அத்தியாவசியத் தேவைகளுக்கு விராலிப்பட்டி சுடுகாட்டை ஒட்டிய ஓடை மற்றும் விவசாய நிலங்களின் வரப்புகள் வழியாகவே ஆபத்தான முறையில் நடந்து செல்ல வேண்டியுள்ளது. அவசர சிகிச்சைக்காக நோயாளிகளை மூன்று கிலோ மீட்டர் தூரம் கட்டிலில் சுமந்து செல்லும் அவல நிலை தொடர்கிறது. விளைபொருட்களைக் கூடச் சந்தைக்குக் கொண்டு செல்ல முடிவதில்லை என விவசாயிகள் குமுறுகின்றனர்.
இந்த மக்கள் பிரச்சனை தொடர்பாக முன்னாள் ஆட்சியாளர்கள், முதலமைச்சர் தனிப்பிரிவு, மாவட்ட ஆட்சியர், மக்கள் பிரதிநிதிகளிடம் பலமுறை மனு அளித்தும் எந்த நடவடிக்கையும் இல்லை. இதுகுறித்து குருநாதநாயக்கனூர் கிராமத்தைச் சேர்ந்த பாஜக தெற்கு மாவட்டத் துணைச் செயலாளர் சிவக்குமார் கூறுகையில், “உடனடியாகச் சாலை அமைத்துத் தராவிட்டால் ஆதார் அட்டை, வாக்காளர் அட்டை, குடும்ப அட்டை, வீட்டுப் பட்டா ஆகியவற்றை அரசிடமே ஒப்படைத்துவிட்டு சொந்த நாட்டிலேயே அனாதைகளாக வாழ முடிவெடுத்துள்ளோம்” என எச்சரித்துள்ளார். இதன் காரணமாக இப்பகுதியில் பெரும் பரபரப்பு ஏற்பட்டுள்ளது
