2024 நாடாளுமன்றத் தேர்தலுக்குப் பிறகு உருவான சர்ச்சையில், காங்கிரஸ் தலைவர் ராகுல் காந்தியை எதிர்த்து தொடரப்பட்ட வழக்கு தொடர்பாக உச்சநீதிமன்றத்தில் நடந்த வாதப்பிரிவின்போது, நீதிபதிகள் கேட்ட கேள்வி பெரும் விவாதத்தை கிளப்பியுள்ளது.
கடந்த ஆண்டு நாடு முழுவதும் நடந்த ‘பாரத் ஜோடோ யாத்திரையின்’ போது, ராகுல் காந்தி, “அருணாச்சலப்பிரதேசத்தில் 2,000 சதுர கி.மீ. நிலத்தை சீனா ஆக்கிரமித்துவிட்டது” எனக் கூறியிருந்தார். இந்தக் கருத்துக்கு எதிராக உத்தரப்பிரதேச சிறப்பு நீதிமன்றத்தில் வழக்கு தொடரப்பட்டது. இதனை ராகுல் காந்தி அலகாபாத் உயர்நீதிமன்றத்தில் தள்ளுபடி செய்ய மனு தாக்கல் செய்தும், அது நிராகரிக்கப்பட்டது.
இதனைத் தொடர்ந்து உச்சநீதிமன்றத்தில் மேல்முறையீடு செய்யப்பட்ட நிலையில், நேற்று நீதிபதிகள் தீபங்கர் தத்தா மற்றும் ஏ.ஜி. மஷி அமர்வில் இந்த வழக்கு விசாரணைக்கு வந்தது. அதில், “இந்தியா-சீனா எல்லையில் நிலம் ஆக்கிரமிக்கப்பட்டது உங்களுக்கு எப்படி தெரியும்? நீங்கள் உண்மையான இந்தியராக இருந்தால் இதுபோல் பேசமாட்டீர்கள். அங்கு நீங்கள் இருந்தீர்களா? ஆதாரங்கள் உள்ளனவா?” என நீதிபதிகள் ராகுல் காந்தியின் தரப்பை கடுமையாக கேள்விக்குள்ளாக்கினர்.
இதற்குப் பதிலளித்த ராகுல் காந்தியின் தரப்பு வழக்கறிஞர் அபிஷேக் மனு சிங்வி, “இப்படி கூட பேச முடியவில்லை என்றால், அவர் எதிர்க்கட்சித் தலைவராக எப்படி செயற்பட முடியும்?” என வாதிட்டார்.
இந்த விவகாரத்தில் காங்கிரஸ் மூத்த தலைவர் பிரியங்கா காந்தி இன்று அறிக்கை ஒன்றை வெளியிட்டுள்ளார். அதில், “உண்மையான இந்தியர் யார் என்பதை நீதிமன்றம் தீர்மானிக்க முடியாது. நாட்டின் நிலவரம் குறித்து கேள்வி எழுப்புவது நாட்டுப்பற்றின் குறியீடே தவிர, நாடு விரோத செயலல்ல,” என தெரிவித்துள்ளார்.
