மணிரத்னம் மற்றும் கமல்ஹாசன் கூட்டணியில் தக் லைஃப் திரைப்படம் நேற்று வெளியானது. ரசிகர்கள் மற்றும் சினிமா பிரியர்களிடையே பெரும் எதிர்பார்ப்பை ஏற்படுத்திய இந்த படம், கலவையான விமர்சனங்களை பெற்றுள்ளது.
அந்த வகையில், இந்த படத்தில் உதவி இயக்குனர்களாக பணியாற்றிய முக்கியமான புதிய முகங்கள், தற்போது இணையத்தில் ஹாட் டாபிக்காக வந்துள்ளனர். குறிப்பாக, பிரபல நடிகர் நடிகையரின் வாரிசுகள் இந்தப் படத்தில் பணியாற்றியுள்ள தகவல்கள் தற்போது வைரலாகி வருகின்றன.
பிரபல நடிகை குஷ்பு தனது இன்ஸ்டாகிராம் பக்கத்தில் தனது மகள் அனந்திகா சுந்தர் தக் லைஃப் படத்தில் உதவி இயக்குநராக பணியாற்றியதைப் பற்றிய ஒரு நெகிழ்ச்சி புகைப்படத்துடன் பதிவு ஒன்றை பகிர்ந்துள்ளார். “கமல் – மணிரத்னம் கூட்டணியில் உருவான படத்தில் மகள் பங்கேற்றது பெருமை!” என அவர் குறிப்பிட்டுள்ளார்.
அதேபோல, லப்பர் பந்து படத்தில் ஹரிஷ் கல்யாணுக்கு ஜோடியாக நடித்த சஞ்சனா கிருஷ்ணமூர்த்தி தக் லைஃப் படத்தில் உதவி இயக்குநராக பணியாற்றியுள்ளார். அவருடைய இந்த புதிய முயற்சிக்கு சமூக வலைதளங்களில் பலரும் பாராட்டு தெரிவித்து வருகின்றனர்.
மேலும், பிரபல நடிகர் ரஹ்மானின் மகள் அலீஷா ரஹ்மானும் இந்தப் படத்தில் உதவி இயக்குநராக பணியாற்றியுள்ளார் என்பது குறிப்பிடத்தக்கது. பொன்னியின் செல்வன் உள்ளிட்ட பல படங்களில் நடித்துள்ள ரஹ்மானின் வாரிசு இந்தத் துறையில் அடியெடுத்து வைத்திருப்பது பலரையும் ஆச்சர்யத்தில் ஆழ்த்தியுள்ளது.
ட்ரெண்டிங் பாடல்கள், கலவையான விமர்சனங்கள்
தக் லைஃப் படத்தில் ரஹ்மானின் இசை மிகுந்த வரவேற்பைப் பெற்றுள்ளது. குறிப்பாக சின்மயி பாடிய பாடல் வீடியோ சமூக வலைதளங்களில் ட்ரெண்டிங்கில் முதல் இடத்தில் உள்ளது. ஆனால், படம் எதிர்பார்த்த அளவுக்கு விமர்சன ரீதியாக வெற்றி பெறவில்லை எனும் கருத்தும் கிளம்பி வருகிறது. சிலரால் படம் விமர்சிக்கப்பட்டாலும், கமல் மற்றும் சிம்புவின் நடிப்புக்கு பெரும்பான்மையானோர் பாராட்டு தெரிவித்துள்ளனர்.
