தமிழக ஏரியில் ஆந்திர கழிவுநீரை வெளியேற்ற முயற்சி ராட்சத குழாய்கள் பதிப்பிற்கு எதிர்ப்பு தெரிவித்து ஒட்டநேரி கிராம மக்கள் சாலை மறியல்…
வேலூர் மாவட்டம், காட்பாடி தாலுகா பொன்னை அடுத்த ஒட்டநேரி பொதுப்பணித்துறை ஏரியில் ஆந்திரப் பகுதி கழிவுநீரைக் கலக்கும் நோக்கில் ராட்சத குழாய்கள் பதிக்கப்படுவதைக் கண்டித்து கிராம மக்கள் திடீர் சாலை மறியலில் ஈடுபட்டனர்.
தமிழக-ஆந்திர எல்லைப் பகுதியில் அமைந்துள்ள ஒட்டநேரி கிராமத்தின் மறுபுறம் ஆந்திர எல்லைக்குட்பட்ட நிலப்பரப்பில் தனியார் ரியல் எஸ்டேட் மாஃபியாக்கள் புதிய வீட்டுமனைகள் அமைக்கப்பட்டு வருகின்றன. இந்நிலையில், அப்பகுதியில் உருவாகும் குடியிருப்புகளிலிருந்து வெளியேறும் கழிவுநீரைத் தங்கள் பகுதியிலேயே சுத்திகரிக்கவோ, வெளியேற்றவோ முனையாமல் தமிழக எல்லைக்குள் இருக்கும் ஒட்டநேரி பொதுப்பணித்துறை ஏரிக்குத் திருப்பும் சதித் திட்டம் தீட்டப்பட்டு வருவதாகக் கூறப்படுகிறது.
இதன் ஒரு பகுதியாக குடியிருப்பு கழிவுநீரை ஒட்டநேரி ஏரிக்குள் கொண்டு சேர்க்கும் வகையில் பிரம்மாண்ட ராட்சத குழாய்களைப் பதிக்கும் பணிகளை ரியல் எஸ்டேட் தரப்பினர் மேற்கொண்டு வந்தனர். இப்பணிகள் நிறைவடைந்தால் எதிர்காலத்தில் அப்பகுதி வீடுகளின் கழிவுநீர் நேரடியாக ஏரிக்கு வந்து சேரும் அபாயம் ஏற்பட்டுள்ளது.
ஒட்டநேரி ஏரி நீரானது அப்பகுதியின் முதன்மை பாசன ஆதாரமாகவும், சுற்றுவட்டாரக் கிராமங்களின் நிலத்தடி நீர் தேவையைப் பூர்த்தி செய்யும் முக்கிய நீர்நிலையாகவும் திகழ்கிறது. கழிவுநீர் ஏரியில் கலந்தால் நீர் முற்றிலும் மாசடைவதோடு, நிலத்தடி நீர் நச்சுத்தன்மையாக மாறி பொதுமக்களுக்குப் பல்வேறு தொற்றுநோய்கள் பரவும் சூழல் உருவாகும். மேலும், கால்நடைகளின் குடிநீர் ஆதாரம் பாழாகி விவசாயிகளின் வாழ்வாதாரம் கேள்விக்குறியாகும் என கிராம மக்கள் கொந்தளிப்புடன் தெரிவிக்கின்றனர்.
தமிழக நீர்நிலையைச் சீரழிக்கும் இச்செயலைக் கண்டித்தும் குழாய் பதிக்கும் பணியை உடனடியாகத் தடுத்து நிறுத்தக் கோரியும் ஒட்டநேரி கிராம மக்கள் விவசாயிகள் திரண்டு ஒட்டநேரி – பொன்னை சாலையில் அமர்ந்து கண்டன கோஷங்களை எழுப்பி மறியல் போராட்டத்தில் ஈடுபட்டனர். இதனால் அப்பகுதியில் சிறிது நேரம் போக்குவரத்து பாதிக்கப்பட்டது.
தகவலறிந்து சம்பவ இடத்திற்கு விரைந்து வந்த ஒட்டநேரி கிராம நிர்வாக அலுவலர் மற்றும் வருவாய்த்துறை அதிகாரிகள் மறியலில் ஈடுபட்ட கிராம மக்களிடம் பேச்சுவார்த்தை நடத்தினர். உரிய நடவடிக்கை எடுப்பதாக அதிகாரிகள் உறுதியளித்ததையடுத்து பொதுமக்கள் போராட்டத்தைக் கைவிட்டு கலைந்து சென்றனர்.
எல்லைப் பகுதியில் நடைபெறும் குழாய் பதிக்கும் பணிகளை வேலூர் மாவட்ட நிர்வாகமும் தமிழக அரசும் உடனடியாக ஆய்வு செய்து, பதிக்கப்பட்டுள்ள ராட்சத குழாய்களை முழுமையாக அகற்ற வேண்டும் என்றும், நீர்நிலையைப் பாதுகாக்கப் போர்க்கால அடிப்படையில் நடவடிக்கை எடுக்க வேண்டும் என்றும் அப்பகுதி மக்கள் வலியுறுத்தியுள்ளனர்.
