நாகை மாவட்டத்தில் சிக்கல் நூலகம் முதன்மை நூலகமாகத் தேர்வு

நாகை மாவட்டத்தில் சிக்கல் நூலகம் முதன்மை நூலகமாகத் தேர்வு: சிக்கல் கிராம சபை கூட்டத்தில் நூலகருக்குப் பாராட்டு:

காந்தி ஜெயந்தியை முன்னிட்டு நாகப்பட்டினம் மாவட்டம் சிக்கல் அரசு மேல்நிலைப் பள்ளியில் நடைபெற்ற கிராம சபை கூட்டத்தில், மாவட்டத்திலேயே சிறந்த நூலகமாகத் தேர்வு செய்யப்பட்ட சிக்கல் ஊராட்சி நூலகத்திற்கும், அதன் பராமரிப்பாளருக்கும் சிறப்பான முறையில் பாராட்டும் கௌரவமும் வழங்கப்பட்டது.
​நாகப்பட்டினம் ஊராட்சி ஒன்றியப் பொருளாளர் இளவரசன் தலைமையில் நடைபெற்ற இக்கூட்டத்தில், ஊராட்சி செயலாளர் சாக்ரடீஸ் வரவு செலவு கணக்குகளையும் வளர்ச்சித் தீர்மானங்களையும் வாசித்தார். மாவட்ட அளவில் முதன்மை நூலகத்திற்கான சான்றிதழைப் பெற்ற சிக்கல் நூலகத்தின் பராமரிப்பாளருக்கு கூட்டத்தில் பொன்னாடை அணிவித்து கௌரவிக்கப்பட்டது.
​தொடர்ந்து கூட்டத்தில் பேசியவர்கள், சிக்கல் ஊராட்சி நூலகத்தில் அனைத்து நாளிதழ்கள் மற்றும் அரிய புத்தகங்கள் சிறப்பாகப் பராமரிக்கப்பட்டு வருவதாகவும், தற்போது ஓய்வுபெற்றவர்களே அதிக அளவில் நூலகத்திற்கு வந்து செல்வதால், இளைய தலைமுறையினரும் மாணவர்களும் இந்த நூலகத்தைப் பெருமளவில் பயன்படுத்தி அறிவை வளர்த்துக்கொள்ள முன்வர வேண்டும் என்றும் வலியுறுத்தினர்.
​மேலும் இக்கூட்டத்தில், கீழத்தரையிருப்பு பகுதியில் சட்டமன்ற உறுப்பினர் நிதியில் பேருந்து நிலையம் அமைத்தல், கீழக்கரையிருப்பு முதல் கரையான்தெரு வரை மற்றும் பழனிவேல் கார்டன், பகுதிகளில் சாலை வசதி ஏற்படுத்துதல், நாடாளுமன்ற உறுப்பினர் நிதியிலிருந்து சுமார் 60 லட்சம் ரூபாய் மதிப்பீட்டில் சமுதாயக் கூடம் அமைத்தல், பள்ளி வளாகத்தில் கூட்ட அரங்கம் மற்றும் பேவர் பிளாக் அமைத்தல் உள்ளிட்ட பல்வேறு முக்கியத் தீர்மானங்கள் ஒருமனதாக நிறைவேற்றப்பட்டன.
​இந்நிகழ்வில் முன்னாள் ஊராட்சி மன்றத் தலைவர், கிராம சுகாதார செவிலியர்கள், அங்கன்வாடி பணியாளர்கள், அரசு அலுவலர்கள் மற்றும் பொதுமக்கள் பொதுமக்கள் கலந்துகொண்டனர்.