மத்திய தகவல் மற்றும் ஒலிபரப்பு அமைச்சகத்தின் கீழ் இயங்கும் சென்னை பத்திரிகை தகவல் அலுவலகம் (PIB) சார்பில், தேனி மாவட்டத்தில் பணியாற்றும் ஊடகவியலாளர்களுக்கான ஒரு நாள் சிறப்புப் பயிலரங்கம் நேற்று மிகச் சிறப்பாக நடைபெற்றது. நவீன ஊடக உலகில் பெருகி வரும் சவால்களை எதிர்கொள்ளும் வகையில் வடிவமைக்கப்பட்ட இந்த நிகழ்வில், பத்திரிகை தகவல் அலுவலகத்தின் தென்மண்டல தலைமை இயக்குநர் (பொறுப்பு) வெ. பழனிச்சாமி சிறப்பு விருந்தினராகக் கலந்துகொண்டு ஊடகவியலாளர்களிடையே உரையாற்றினார். அப்போது பேசிய அவர், தற்போதைய சூழலில் செய்தியாளர்கள் வெறும் பரபரப்பு செய்திகளுக்கு மட்டும் முன்னுரிமை அளிக்காமல், நாட்டின் ஒட்டுமொத்த வளர்ச்சி மற்றும் சமூக முன்னேற்றம் சார்ந்த ஆக்கப்பூர்வமான செய்திகளுக்கு அதிக முக்கியத்துவம் அளிக்க வேண்டும் என வலியுறுத்தினார். அரசின் நலத்திட்டங்கள் சமூகத்தின் கடைக்கோடி மனிதரையும் சென்றடைவதை உறுதி செய்யும் ஒரு பாலமாக ஊடகங்கள் செயல்பட வேண்டும் என்பதே இத்தகைய பயிலரங்கின் நோக்கம் என்று அவர் குறிப்பிட்டார்.
குறிப்பாக, தற்போது உலகளாவிய சவாலாக உருவெடுத்துள்ள செயற்கை நுண்ணறிவு (AI) தொழில்நுட்பத்தைப் பயன்படுத்தி பரப்பப்படும் போலிச் செய்திகளை (Fake News) அடையாளம் காணும் நவீனத் திறன்களை ஊடகவியலாளர்கள் கட்டாயம் வளர்த்துக்கொள்ள வேண்டும் என்று அவர் அறிவுறுத்தினார். எந்தவொரு தகவலையும் அதன் உண்மைத்தன்மையை பல்வேறு கோணங்களில் முழுமையாக ஆராய்ந்த பின்னரே பொதுவெளியில் பகிர வேண்டும் என எச்சரித்த அவர், பிரதமரின் ‘யசஸ்வி’ போன்ற உயர்கல்வி உதவித்தொகை திட்டங்கள் குறித்து முறையான விழிப்புணர்வு ஏற்படுத்துவதன் மூலம் ஆயிரக்கணக்கான ஏழை மாணவர்கள் பயன்பெற ஊடகங்கள் வழிவகை செய்ய வேண்டும் எனத் தெரிவித்தார். இக்காலக்கட்டத்தில் டிஜிட்டல் தளங்களில் பரவும் தவறான தகவல்கள் சமூக அமைதியைக் குலைக்கக்கூடும் என்பதால், ஊடகவியலாளர்களின் பொறுப்புணர்வு முன்னெப்போதையும் விட இப்போது அதிகம் தேவைப்படுகிறது.
இந்த உயர்மட்டப் பயிலரங்கில் பல்வேறு துறை சார்ந்த வல்லுநர்கள் கலந்துகொண்டு விரிவான விளக்கங்களை வழங்கினர். மதுரை மண்டல தொழிலாளர் நல ஆணையர் பிரவீன் பாண்டி மோகன்தாஸ், மத்திய அரசின் புதிய தொழிலாளர் சட்டங்கள் மற்றும் தொழிலாளர் பாதுகாப்பு குறித்த சட்ட நுணுக்கங்களை விளக்கினார். அதனைத் தொடர்ந்து, நறுமணப் பொருட்கள் வாரிய உதவி இயக்குனர் செந்தில்குமரன், தேனி மாவட்டத்தின் முக்கியப் பொருளாதராமாக விளங்கும் ஏலக்காய் துறையை சர்வதேச அளவில் வலுப்படுத்துவது மற்றும் விவசாயிகளுக்கான திட்டங்கள் குறித்து உரையாற்றினார். ஊடகத்துறை வல்லுநர் ஹபீப் ரகுமான், செயற்கை நுண்ணறிவு மற்றும் நவீன தொழில்நுட்பக் கருவிகள் மூலம் தகவல்களின் உண்மைத்தன்மையைக் கண்டறியும் (Fact-Checking) செயல்முறை பயிற்சிகளை ஊடகவியலாளர்களுக்கு வழங்கினார். முன்னதாக, சென்னை பத்திரிகை தகவல் அலுவலக இயக்குநர் பி. அருண் குமார் வரவேற்புரையாற்றினார். நிறைவாக, மதுரை கள விளம்பர உதவியாளர் ஜெ. போஸ்வெல் ஆசிர் நன்றி கூறினார். தேனி மாவட்டத்தைச் சேர்ந்த ஏராளமான அச்சு மற்றும் காட்சி ஊடகவியலாளர்கள் திரளாகக் கலந்துகொண்ட இக்கூட்டம், மாவட்டத்தின் ஊடகத் தரத்தை அடுத்த நிலைக்கு எடுத்துச் செல்லும் ஒரு மைல்கல்லாக அமைந்தது.
