தமிழகத்தில் வரும் 2026-ஆம் ஆண்டு நடைபெற உள்ள சட்டமன்றப் பொதுத்தேர்தலை முன்னிட்டு, வாக்காளர் பட்டியலைச் சீரமைக்கும் பணிகளை இந்தியத் தேர்தல் ஆணையம் தீவிரப்படுத்தியுள்ளது. அதன் ஒரு பகுதியாக, கோவை மாவட்டத்தில் உள்ள 10 சட்டமன்றத் தொகுதிகளிலும் விடுபட்ட வாக்காளர்களைச் சேர்க்கவும், திருத்தங்களை மேற்கொள்ளவும் இன்றும் (சனிக்கிழமை), நாளை (ஞாயிற்றுக்கிழமை) ஆகிய இரண்டு நாட்கள் சிறப்பு முகாம்கள் நடத்தப்படுகின்றன. வரைவு வாக்காளர் பட்டியலில் பெயர் இல்லாதவர்கள் மற்றும் வரும் 2026 புத்தாண்டில் 18 வயது பூர்த்தியடையும் இளைஞர்கள் இந்த வாய்ப்பைப் பயன்படுத்தித் தங்களைப் புதிய வாக்காளர்களாகப் பதிவு செய்துகொள்ள மாவட்ட நிர்வாகம் அறிவுறுத்தியுள்ளது.
கோவை மாவட்டத்தில் உள்ள 1,062 மையங்களில் அமைக்கப்பட்டுள்ள மொத்தம் 3,563 வாக்குச்சாவடிகளிலும் இந்தச் சிறப்பு முகாம்கள் காலை 10:00 மணி முதல் மாலை 5:00 மணி வரை நடைபெறுகின்றன. இது குறித்து மாவட்டத் தேர்தல் பிரிவு அதிகாரிகள் கூறுகையில், “18 வயது நிரம்பிய தகுதியுள்ள அனைவரும் தங்களது ஆதார் அட்டை நகல் மற்றும் புகைப்படத்துடன் அந்தந்தப் பகுதி வாக்குச்சாவடிகளுக்குச் சென்று விண்ணப்பிக்கலாம். புதிய வாக்காளர்கள் பெயர் சேர்க்க ‘படிவம்-6’-ஐயும், பட்டியலில் இருந்து பெயர் நீக்கம் செய்ய ‘படிவம்-7’-ஐயும் பயன்படுத்த வேண்டும். மேலும், ஒரே தொகுதிக்குள் முகவரி மாற்றம் செய்ய அல்லது வாக்காளர் அடையாள அட்டையில் உள்ள பிழைகளைத் திருத்தம் செய்ய ‘படிவம்-8’-ஐப் பூர்த்தி செய்து வழங்கலாம்” என்று தெரிவித்தனர்.
பொதுமக்களுக்கு உதவும் வகையில் ஒவ்வொரு வாக்குச்சாவடியிலும் சிறப்பு உதவி மையங்கள் அமைக்கப்பட்டு, உரிய வழிகாட்டுதல்கள் வழங்கப்பட்டு வருகின்றன. நேரில் வர இயலாதவர்கள் ‘Voters Service Portal’ என்ற இணையதளம் அல்லது ‘Voter Helpline’ செயலி மூலமாகவும் விண்ணப்பிக்கலாம் எனத் தெரிவிக்கப்பட்டுள்ளது. மேலும், வாக்காளர் பட்டியல் தொடர்பான சந்தேகங்களுக்கு ‘1950’ என்ற கட்டணமில்லாத் தொலைபேசி எண்ணைத் தொடர்பு கொண்டு விளக்கம் பெறலாம். ஜனநாயகக் கடமையாற்ற முதற்படியாக வாக்காளர் பட்டியலில் பெயர் இருப்பதை உறுதி செய்வது அவசியம் என்பதால், சனி மற்றும் ஞாயிறு ஆகிய விடுமுறை நாட்களில் நடைபெறும் இந்தச் சிறப்பு முகாம்களைக் கோவை மாவட்டப் பொதுமக்கள் பெருமளவில் பயன்படுத்திக் கொள்ளுமாறு கேட்டுக்கொள்ளப்படுகிறார்கள்.
