சென்னை :
சென்னை வியாசர்பாடி, முல்லை நகரில் மே 26ஆம் தேதி ஏற்பட்ட தீவிபத்தில் பல குடிசைகள் முற்றிலும் தீக்கிரையாகியுள்ளன. தீயணைப்புத் துறையினர் உடனடியாக விரைந்து செயல்பட்டதால் உயிரிழப்புகள் தவிர்க்கப்பட்டதாகத் தகவல்கள் தெரிவிக்கின்றன. தீவிபத்தில் பாதிக்கப்பட்டவர்கள் அருகிலுள்ள பள்ளியில் தற்காலிகமாக தங்க வைக்கப்பட்டுள்ளனர்.
இந்த சூழலில், தமிழ்நாடு வெற்றிக் கழகம் (த.வெ.க.) சார்பில் உதவித்தொகுப்புகள் வழங்கபட்டுள்ளன. இதனை காவல்துறையினர் தடுக்க முயற்சித்ததாகவும், உதவி செய்த த.வெ.க. உறுப்பினர்கள் மீது அக்கிரமம் நடத்தியதாகவும் அக்கட்சியின் தலைவர் விஜய் குற்றம்சாட்டியுள்ளார்.
த.வெ.க. உறுப்பினர்களுக்கு தாக்குதல் :
த.வெ.க. மாவட்டச் செயற்குழு உறுப்பினர் கங்காவதி, “உதவியை ஏன் தடுக்கிறீர்கள் ?” என்று கேள்வி எழுப்பியதற்காக, அவரை காவல்துறையினர் விரைவில் தாக்கியதாகவும், அவருடைய வயிற்றில் உதைபட்டதாகவும் கூறப்படுகிறது. மேலும், த.வெ.க. மகளிரணியைச் சேர்ந்த தமிழ்ச்செல்வியின் ஆடையை இழுத்து தாக்கியதாகவும் குற்றச்சாட்டு எழுந்துள்ளது. காயமடைந்தவர்கள் தற்போது ஸ்டான்லி மருத்துவமனையில் சிகிச்சை பெற்று வருகின்றனர்.
விஜயின் கடும் கண்டனம்
இந்த சம்பவம் குறித்து த.வெ.க தலைவர் விஜய், தனது சமூக வலைதளத்தில் பதிவு ஒன்றை வெளியிட்டுள்ளார். அதில், “மக்களுக்கு உதவ விரைந்தவர்களைத் தாக்கும் அரசு, உண்மையில் பாசிச ஆட்சி நடத்துவதாகும். இது மக்களாட்சி அல்ல, அதிகாரத் திமிர் பிடித்த ஆட்சியாகும்,” எனக் கூறியுள்ளார்.
மேலும், பெண்களுக்கு பாதுகாப்பு வழங்கும் அரசாக தன்னை விளம்பரப்படுத்தும் மு.க.ஸ்டாலின் தலைமையிலான அரசு, பெண் நிர்வாகிகளையே தாக்கும் அளவிற்கு காவல்துறையை பயன்படுத்துவதை கடுமையாக விமர்சித்துள்ளார்.
தவறான காவல்துறைக் கோணத்தை மாற்ற வேண்டும்
“காவல் துறை அரசு ஏவலுக்கேற்ப செயல்படுவதை ஒருபோதும் ஏற்க முடியாது. பாதிக்கப்பட்ட மக்களுக்கு உதவிசெய்ய வந்தவர்களை தாக்கும் காவலர்களுக்கு எதிராக உடனடி நடவடிக்கை எடுக்க வேண்டும்,” என வலியுறுத்திய விஜய், தொடர்ச்சியான அக்கிரமங்கள் தொடர்ந்தால், த.வெ.க. சார்பில் மக்கள் மற்றும் சட்டப்போராட்டம் நடத்தப்படும் என்றும் தெரிவித்துள்ளார்.
