மன்னார்குடி அருகே மதுபானக் கடையை அகற்றக்கோரி கிராம மக்கள் சாலை மறியல்
முத்துப்பேட்டை–மன்னார்குடி சாலையில் 2 மணி நேரம் போக்குவரத்து பாதிப்பு…
திருவாரூர் மாவட்டம் மன்னார்குடி அருகே 47 தென்பாதி பகுதியில் செயல்பட்டு வரும் மதுபானக் கடையை அகற்ற வலியுறுத்தி கிராம மக்கள் சாலை மறியல் போராட்டத்தில் ஈடுபட்டனர். இதனால் முத்துப்பேட்டை–மன்னார்குடி சாலையில் சுமார் 2 மணி நேரம் போக்குவரத்து பாதிக்கப்பட்டது.
மன்னார்குடி அருகே 47 தென்பாதி துளசேந்திரபுரம் சாலையில் மதுபானக் கடை செயல்பட்டு வருகிறது. இந்த மதுபானக் கடையால் அப்பகுதியில் வசிக்கும் பொதுமக்களுக்கு பல்வேறு இடையூறுகள் ஏற்படுவதாக கிராம மக்கள் குற்றம் சாட்டினர். குறிப்பாக பெண்கள், பள்ளி மாணவர்கள் மற்றும் பொதுமக்கள் அந்த வழியாக செல்லும்போது சிரமங்களை எதிர்கொள்வதாகவும், மதுபானக் கடையை சுற்றியுள்ள பகுதியில் சட்டம்-ஒழுங்கு பிரச்சினைகள் ஏற்படும் சூழல் உள்ளதாகவும் தெரிவித்தனர். இதனால் பொதுமக்களின் பாதுகாப்பை கருத்தில் கொண்டு, 47 தென்பாதி பகுதியில் செயல்பட்டு வரும் மதுபானக் கடையை உடனடியாக அகற்ற வேண்டும் என்று வலியுறுத்தி கிராம மக்கள் ஒன்று திரண்டு சாலை மறியல் போராட்டத்தில் ஈடுபட்டனர். இதுகுறித்து தகவல் அறிந்த அதிகாரிகள் சம்பவ இடத்திற்கு வந்த வட்டாட்சியர் மற்றும் காவல் துணை கண்காணிப்பாளர் போராட்டத்தில் ஈடுபட்ட கிராம மக்களிடம் தாசில்தார் பேச்சுவார்த்தை நடத்தினார். மதுபானக் கடையை அகற்ற வேண்டும் என கோரிக்கை வைத்தனர் ஒரு மாதத்திற்குள் இந்த பகுதியில் மதுபான கடை மூடப்படும் என உறுதியளித்த பின்பு கிராம மக்கள் சாலை மறியல் போராட்டத்தை கைவிட்டனர். இதையடுத்து போராட்டத்தில் ஈடுபட்டவர்கள் அங்கிருந்து கலைந்து சென்றனர். பின்னர் முத்துப்பேட்டை–மன்னார்குடி சாலையில் இரண்டு மணி நேரத்திற்கு மேலாக போக்குவரத்து பாதிப்பு ஏற்பட்டது.
