தமிழ் சினிமாவில் ரசிகர்களால் பெரிதும் கொண்டாடப்படும் நடிகர் விஜயின் பழைய வெற்றிப்படம் ’குஷி’ மீண்டும் திரையரங்கில் வெளியாக உள்ளது.
2000-ஆம் ஆண்டு எஸ்.ஜே.சூர்யா இயக்கத்தில் விஜய் – ஜோதிகா ஜோடியாக வெளியான ’குஷி’, அன்றைய காலகட்டத்தில் மிகப்பெரிய வரவேற்பைப் பெற்றது. ஏ. எம். ரத்னம் தயாரித்திருந்த இப்படத்துக்கு தேவா இசையமைத்தார். மேக்கரீனா, ஒரு பொண்ணு ஒன்னு, கட்டிப்பிடி உள்ளிட்ட பாடல்கள் பெரும் ஹிட்டாகி இன்றும் ரசிகர்களின் பிளேலிஸ்டில் இடம்பிடித்துள்ளன.
இளைஞர்களின் காதல் உணர்வுகளை மையமாகக் கொண்டு எடுக்கப்பட்ட ’குஷி’, விஜயின் ரசிகர் பட்டாளத்தில் தனி இடத்தை பிடித்திருந்தது. அதனால் தான் இன்றளவும் பலரின் ஃபேவரிட் திரைப்படமாகவும் இருந்து வருகிறது.
ஏற்கனவே விஜயின் கில்லி மற்றும் சச்சின் படங்கள் ரீ-ரிலீஸாகி நல்ல வசூலை பெற்ற நிலையில், தற்போது ’குஷி’ திரைப்படம் செப்டம்பர் 25-ம் தேதி புதிய வடிவில் ரீ-ரிலீஸ் செய்யப்பட இருப்பதாக அறிவிக்கப்பட்டுள்ளது.
இச்செய்தி, நடிகர் விஜய் ரசிகர்களிடையே பெரும் உற்சாகத்தை ஏற்படுத்தியுள்ளது. தற்போது முழுநேர அரசியலில் ஈடுபட்டு வரும் விஜய், தனது இறுதி திரைப்படமாக ’ஜனநாயகன்’ படத்தில் நடித்து வருவது குறிப்பிடத்தக்கது.
