ஜம்மு-காஷ்மீரின் பஹல்காமில் சுற்றுலா பயணிகள் மீது நடந்த பயங்கரவாத தாக்குதலுக்கு பிறகு, இந்தியா பாகிஸ்தானுடனான இறக்குமதி மற்றும் ஏற்றுமதி நடவடிக்கைகளை முற்றிலுமாக நிறுத்தியுள்ளது. இதன் மூலம், இரு நாடுகளுக்கிடையிலான வர்த்தக உறவு மேலும் மோசமாகியுள்ளது.
பாகிஸ்தானுடன் இந்தியாவின் உறவுகள் கடந்த சில ஆண்டுகளாகவே பலமடங்காக பலவீனமாகி வருகின்றன. 2019 புல்வாமா தாக்குதலைத்தொடர்ந்து இந்தியா, பாகிஸ்தானிலிருந்து வரும் பொருட்களுக்கு 200% வரி விதித்து வர்த்தகத்தில் கடுமையான கட்டுப்பாடுகளை விதித்தது. அதன் பின் இருநாடுகளுக்கிடையிலான வர்த்தகம் தொடர்ந்து குறைந்து வந்தது.
வர்த்தக புள்ளிவிவரங்கள் என்ன சொல்கின்றன?
- 2018-19: இருநாடுகளுக்கிடையிலான மொத்த வர்த்தகம் ரூ.4,370 கோடி.
- 2019-20: அட்டாரி நிலத்தரகு வர்த்தகம் ரூ.2,772 கோடிக்கு குறைவு.
- 2021-22: இந்தியா பாகிஸ்தானுக்கு $513.82 மில்லியன் ஏற்றுமதி செய்தது.
- 2022-23: ஏற்றுமதி $627.10 மில்லியன், இறக்குமதி $20.11 மில்லியன்.
- 2023-24: இறக்குமதி $2.88 மில்லியனாக வீழ்ச்சி, ஆனால் இந்தியா ஏற்றுமதி $1,180 மில்லியனாக உயர்வு.
இதிலிருந்து, பாகிஸ்தானுடன் இந்தியாவின் மொத்த வர்த்தகம், நாட்டின் ஒட்டுமொத்த சர்வதேச வர்த்தகத்தில் 0.06% மட்டுமே என்பதால், இந்த முடிவால் இந்தியாவுக்கு பெரிய பாதிப்பு ஏற்படாது. ஆனால், இந்தியாவிலிருந்து அதிக பொருட்களை இறக்குமதி செய்யும் பாகிஸ்தான் இந்த முடிவால் கடுமையாக பாதிக்கப்படும் என பொருளாதார நிபுணர்கள் தெரிவிக்கின்றனர்.
பாகிஸ்தானிலிருந்து இந்தியாவுக்கு வருகிற முக்கிய பொருட்கள்:
தர்பூசணி, முலாம்பழம், சிமெண்ட், உலர் பழங்கள், உலோக கலவைகள், முல்தானி மிட்டி போன்றவை.
இந்தியாவிலிருந்து பாகிஸ்தானுக்கு அனுப்பப்படும் பொருட்கள்:
தேங்காய், காய்கறிகள், தேநீர், மசாலா, மருந்துகள், பிளாஸ்டிக் பொருட்கள், சாயங்கள், கால்நடை தீவனம் போன்றவை.
பாகிஸ்தானிலிருந்து வரக்கூடிய சில பொருட்கள் இந்தியாவில் இனிமேல் விலை ஏற வாய்ப்புள்ளதாக நிபுணர்கள் கூறுகின்றனர். ஆனால் இந்தியாவின் பொருளாதாரம் மீது அதுவும் பெரிதாக தாக்கம் செலுத்தாது எனவும் அவர்கள் மதிப்பீடு செய்கின்றனர்.
