தமிழக சட்டமன்றத் தேர்தல் களம் உச்சக்கட்ட பரபரப்பை எட்டியுள்ள நிலையில், மதுரையில் நேற்று நடைபெற்ற தேசிய ஜனநாயகக் கூட்டணியின் (NDA) பிரம்மாண்டப் பொதுக்கூட்டம் அரசியல் அரங்கில் பெரும் அதிர்வலைகளை ஏற்படுத்தியுள்ளது. பாரதப் பிரதமர் நரேந்திர மோடி பங்கேற்று எழுச்சியுரையாற்றிய இந்த நிகழ்வு, அதிமுக – பாஜக உள்ளடக்கிய கூட்டணியின் பலத்தை நிரூபிக்கும் வகையில் அமைந்தது. பிரதமர் மோடியுடன் மேடையில் அதிமுக பொதுச்செயலாளர் எடப்பாடி கே. பழனிசாமி மற்றும் கூட்டணிக் கட்சித் தலைவர்கள் அணிவகுத்து நின்றது தொண்டர்களிடையே உற்சாகத்தை ஏற்படுத்தியுள்ளது.
பொதுக்கூட்டம் முடிந்த கையோடு, மதுரையில் உள்ள தனியார் ஹோட்டல் ஒன்றில் எடப்பாடி பழனிசாமி தலைமையில் நள்ளிரவு வரை நீடித்த முக்கிய ஆலோசனைக் கூட்டம் நடைபெற்றது. இதில் பாஜகவின் தமிழக தேர்தல் பொறுப்பாளர் பியூஷ் கோயல், மத்திய இணை அமைச்சர் எல்.முருகன், பாஜக மாநிலத் தலைவர் நயினார் நாகேந்திரன், அமமுக பொதுச்செயலாளர் டி.டி.வி. தினகரன், பாமக தலைவர் அன்புமணி ராமதாஸ், தமாகா தலைவர் ஜி.கே.வாசன் மற்றும் ஐஜேகே நிறுவனர் டாக்டர் பாரிவேந்தர் உள்ளிட்ட முக்கியத் தலைவர்கள் கலந்துகொண்டனர். இந்தக் கூட்டத்தில், வரும் மார்ச் 11-ம் தேதி திருச்சியில் பிரதமர் மோடி பங்கேற்க உள்ள அடுத்தகட்ட மெகா பொதுக்கூட்டத்திற்கான ஏற்பாடுகள் குறித்து விரிவாக விவாதிக்கப்பட்டது.
திமுக கூட்டணியில் தொகுதிப் பங்கீடு பேச்சுவார்த்தைகள் விறுவிறுப்பாக நடைபெற்று வரும் சூழலில், என்.டி.ஏ கூட்டணியில் இன்னும் முறைப்படியான பேச்சுவார்த்தை தொடங்காதது குறித்து கூட்டணிக் கட்சித் தலைவர்கள் எடப்பாடி பழனிசாமியிடம் தங்களது கவலையை வெளிப்படுத்தியுள்ளனர். “தொகுதிப் பங்கீட்டை விரைந்து இறுதி செய்தால் மட்டுமே தேர்தல் பரப்புரையைத் தீவிரப்படுத்த முடியும்; எந்தச் சின்னத்தில் போட்டியிடுவது என்பது போன்ற முக்கிய முடிவுகளை எடுக்க ஏதுவாக இருக்கும்” என அவர்கள் வலியுறுத்தியுள்ளனர். மேலும், தொகுதிப் பங்கீட்டிற்கான அதிகாரப்பூர்வக் குழுவை அதிமுக உடனடியாக அமைக்க வேண்டும் என்றும் தலைவர்கள் கேட்டுக்கொண்டுள்ளனர்.
இந்த அரசியல் நெருக்கடிகளுக்கு மத்தியில், அதிமுகவின் மாவட்டச் செயலாளர்கள் கூட்டம் வரும் மார்ச் 4-ம் தேதி சென்னையில் நடைபெற உள்ளது. இந்தக் கூட்டத்திற்குப் பிறகு தொகுதிப் பங்கீட்டுக் குழுவை எடப்பாடி பழனிசாமி அறிவிப்பார் என எதிர்பார்க்கப்படுகிறது. இதற்கிடையில், எடப்பாடி பழனிசாமி திடீரென டெல்லிக்குப் பயணம் மேற்கொண்டிருப்பது அரசியல் வட்டாரத்தில் பெரும் எதிர்பார்ப்பை ஏற்படுத்தியுள்ளது. டெல்லியில் பாஜக மேலிடத் தலைவர்களைச் சந்தித்துப் பேச உள்ள அவர், இழுபறியில் உள்ள தொகுதிப் பங்கீடு மற்றும் முக்கியத் தொகுதிகள் குறித்த சிக்கல்களுக்கு ஒரு நிரந்தரத் தீர்வை எட்டி, வெற்றிக் கூட்டணியை இறுதி செய்வார் என அரசியல் நோக்கர்கள் கருதுகின்றனர்.
