திருவாரூரில் ரயில்வே கேட் மீது டாட்டா ஏசி வாகனம் மோதி விபத்து – கேட் இரண்டாக உடைந்ததால் போக்குவரத்து பாதிப்பு; தனி ஒருவராகப் போராடிய கேட் கீப்பர்!
திருவாரூர்-06
திருவாரூர் அருகே சிங்களாஞ்சேரி கிராமத்தில் ரயில்வே கேட் மீது அதிவேகமாக வந்த டாட்டா ஏசி வாகனம் மோதியதில் கேட் இரண்டு துண்டுகளாக உடைந்தது. சம்பவம் நடந்து பல மணி நேரமாகியும் ரயில்வே காவல்துறையினர் சம்பவ இடத்திற்கு வராததால், தனி ஒருவராக நின்று போக்குவரத்தையும் பாதுகாப்புப் பணிகளையும் சமாளித்த கேட் கீப்பரால் அப்பகுதியில் பரபரப்பு ஏற்பட்டது.
திருவாரூரில் இருந்து கூத்தாநல்லூர், லட்சுமாங்குடி, மன்னார்குடி, பட்டுக்கோட்டை உள்ளிட்ட பல்வேறு பகுதிகளுக்குச் செல்லும் பிரதான சாலையில் சிங்களாஞ்சேரி ரயில்வே கேட் அமைந்துள்ளது.
இந்நிலையில், இன்று ரயில் செல்வதற்காக எச்சரிக்கை ஒலி எழுப்பப்பட்டு ரயில்வே கேட் மூடப்பட்டுக் கொண்டிருந்தபோது, அவசரமாகத் தண்டவாளத்தைக் கடக்க முயன்ற டாட்டா ஏஸ் வாகனம் கேட் மீது மோதியது. இதில் ரயில்வே கேட் இரண்டு துண்டுகளாக உடைந்தது. இதையடுத்து வாகனத்தைப் பிடிக்க ரயில்வே ஊழியர்கள் முயன்றபோது, அந்த வாகனத்தில் வந்தவர்கள் அங்கிருந்து தப்பிச் சென்றதாகக் கூறப்படுகிறது.
கேட் உடைந்ததால் அதை வழக்கம்போல் மூட முடியாத நிலை ஏற்பட்டது. அதே நேரத்தில் ரயிலும் வந்ததால் அப்பகுதியில் பெரும் பரபரப்பு நிலவியது. இதையடுத்து சமயோசிதமாகச் செயல்பட்ட கேட் கீப்பர், சாலையின் இருபுறங்களிலும் போக்குவரத்தைத் தடுத்து நிறுத்தி, ரயில் பாதுகாப்பாகச் செல்லும் வரை வாகனங்கள் மற்றும் பொதுமக்களைத் தண்டவாளத்தைக் கடக்க விடாமல் தடுத்து விபத்து ஏற்படாமல் பாதுகாத்தார்.
ரயில் சென்ற பின்னரும் உடைந்த கேட்டைத் திறந்து மூட முடியாததால், சாலையின் இருபுறங்களிலும் கடுமையான போக்குவரத்து நெரிசல் ஏற்பட்டது. இதற்கிடையே, சம்பவம் குறித்து தகவல் தெரிவிக்கப்பட்டும் பல மணி நேரமாக ரயில்வே காவல்துறை அதிகாரிகள் சம்பவ இடத்திற்கு வரவில்லை எனக் கூறப்படுகிறது. இதனால் கேட் கீப்பர் தனி ஒருவராகப் பல்வேறு சிரமங்களைச் சந்தித்து போக்குவரத்தைச் சமாளிக்க வேண்டிய நிலை ஏற்பட்டது.
பின்னர் அங்கு வந்த ரயில்வே ஊழியர்கள் உடைந்த கேட்டைச் சீரமைக்க முயன்றும் உடனடியாகச் செயல்பாட்டுக்குக் கொண்டுவர முடியவில்லை. இதையடுத்து தற்காலிக ஏற்பாடாக ரயில்வே கேட்டைத் தூக்கி திறந்து வைத்து போக்குவரத்து அனுமதிக்கப்பட்டது.
இந்த வழியாக நாள்தோறும் பத்துக்கும் மேற்பட்ட ரயில்கள் இயக்கப்படும் நிலையில், ஒவ்வொரு ரயிலும் கடந்து செல்லும்போதும் போக்குவரத்தைத் தடுத்து நிறுத்தி வாகனங்களைக் கட்டுப்படுத்துவது கேட் கீப்பருக்குப் பெரும் சவாலாக மாறியுள்ளது.
ரயில்வே காவல்துறையினர் சம்பவ இடத்திற்கு வராத நிலையில், ரயில்வே துறை ஊழியர்களுடன் பொதுமக்களும் இணைந்து போக்குவரத்தைச் சீரமைக்கும் பணியில் ஈடுபட்டனர்.
முக்கியத்துவம் வாய்ந்த பிரதான சாலையில் இத்தகைய விபத்து ஏற்பட்டும், உரிய நேரத்தில் ரயில்வே காவல்துறையினர் வராதது குறித்து பொதுமக்கள் கடும் அதிருப்தி தெரிவித்தனர்.
தற்போது ரயில்வே துறை அதிகாரிகள் மற்றும் ஊழியர்கள் உடைந்த ரயில்வே கேட்டைச் சீரமைக்கும் பணியில் தொடர்ந்து ஈடுபட்டு வருகின்றனர்.
