சினிமா, வெப்சீரிஸ் என பல்வேறு தளங்களில் தன் திறமையை வெளிப்படுத்தி வரும் நடிகர் சித்தார்த், தற்போது புதிய ஆங்கில ஓடிடி தொடரில் நடிக்க உள்ளார்.
அமெரிக்க எழுத்தாளர் ஜும்பா லஹிரி எழுதிய விருது பெற்ற சிறுகதைத் தொகுப்பு “Unaccustomed Earth” அடிப்படையாகக் கொண்டு, அதே பெயரில் நெட்ஃபிலிக்ஸ் ஓடிடி தளம் ஆங்கிலத் தொடரை தயாரிக்கிறது. எட்டு எபிசோடுகளைக் கொண்ட இந்த ரொமான்டிக் கதை, இந்திய-அமெரிக்க சமூகத்தின் கலாச்சாரத்தை பிரதிபலிக்கும் வகையில் உருவாகிறது.
இதில், சித்தார்த் அமித் முகர்ஜி எனும் முன்னாள் காதலன் கதாபாத்திரத்தில் நடிக்கிறார். பருல் சவுத்ரி எனும் மனைவியாக குடும்ப வாழ்க்கையில் இருக்கும் ஃப்ரீடா பிண்டோ, தனது பழைய காதலனான அமித்தை பல வருடங்களுக்கு பிறகு சந்திக்கும் போது, அவளின் வாழ்க்கை மாற்றமடைகிறது. வேலை மற்றும் காதலை சமநிலை செய்ய முடியாமல் தவிக்கும் அமித் – பருல் மீண்டும் இணைவது, அவர்களது சமூகத்தில் சிக்கல்களை உருவாக்குகிறது என்பதே தொடரின் மையக்கதை.
இந்தத் தொடரை ‘3 Body Problem’, ‘The Nevers’ போன்ற தொடர்களில் பணியாற்றிய மாதுரி ஷேகர் எழுதியுள்ளார். முதல் இரண்டு எபிசோடுகளை ‘The Lunchbox’, ‘Photograph’ ஆகியவற்றை இயக்கிய ரிதேஷ் பத்ரா இயக்குகிறார்.
இது குறித்து சித்தார்த் தனது இன்ஸ்டாகிராமில்,
“பிரபஞ்சத்திற்கு நன்றி. என் வாழ்க்கை என்கிற கனவின் அடுத்த அத்தியாயத்திற்காக மகிழ்ச்சியடைகிறேன். Unaccustomed Earth தொடரில் ஒரு பகுதியாக இருப்பதும், சிறந்த நடிகர்கள் மற்றும் குழுவினருடன் பணியாற்றுவதும் பெருமையாக உள்ளது,”
என்று குறிப்பிட்டுள்ளார்.
