மதுரை: உலகப்புகழ் பெற்ற சித்திரை திருவிழாவின் சிறப்புமிக்க நிகழ்வாக, இன்று அதிகாலை 6 மணிக்கு அழகர் வைகை ஆற்றில் எழுந்தருளினார். ‘கோவிந்தா கோவிந்தா’ என பக்தர்களின் முழக்கம் விண்ணை முட்ட, பச்சைப் பட்டாடை தரித்த தங்கக் குதிரை வாகனத்தில் கள்ளழகர் வைகையில் காட்சியளித்தார்.
மதுரை அழகர் கோயிலில் மே 8ம் தேதி தொடங்கிய சித்திரை திருவிழா பெருவிழா போல் நடைபெற்று வருகிறது. முதல் இரு நாட்களில் சுந்தரராஜப் பெருமாள் தோளுக்கினியான் வாகனத்தில் எழுந்தருளினார். மூன்றாம் நாளான மே 10ம் தேதி திருக்கல்யாண மண்டபத்தில் திருமண மகோற்சவம் நடைபெற்றது.
அதையடுத்து, கள்ளழகர், கண்டாங்கி பட்டுடை, நெற்றிப்பட்டை, கரங்களில் வளைகள், நேரிக்கம்பு உள்ளிட்ட அணிகலன்களுடன், தங்கப்பல்லக்கில் எழுந்தருளி, மண்டூக முனிவருக்கு சாபவிமோசனம் அளிக்க புறப்பட்டார்.
இன்று சித்திரா பவுர்ணமி நாளில் ஆழ்வார்புரம் வைகை ஆற்றில் எழுந்தருளியவர், காலை 7.25 மணிக்கு வீரராகவப் பெருமாளுக்கு மாலைசாற்றி, அங்கிருந்து ராமராயர் மண்டபத்திற்கு புறப்பட்டார். வழியிலுள்ள மண்டகப்படிகளில் பக்தர்கள் குளிர்ந்த தண்ணீர் தெளித்து வழிபட்டனர்.
இரவு நேரத்தில் அழகர், வண்டியூர் வீரராகவப் பெருமாள் கோயிலில் தங்குகிறார். நாளை (மே 13) தேனூர் மண்டகப்படியில் மண்டூக முனிவருக்கு சாபவிமோசனம் அளிக்கிறார். அதனைத் தொடர்ந்து, ராமராயர் மண்டபத்தில் விடிய விடிய தசாவதாரம் நிகழ்ச்சி நடைபெற உள்ளது.
இந்த விழாவைக் காண, மதுரை நகரம் முழுவதும் பண்டிகை போல் மெருகேறி இருந்தது. லட்சக்கணக்கான பக்தர்கள் குடும்பங்களோடு வந்து அழகரை தரிசனம் செய்தனர். நகரம் முழுவதும் பக்தர்களின் ஆனந்த நிறைவு காணக்கிடைத்தது.
