ரூ.200-க்கு சிறப்பு மளிகை தொகுப்பு விற்பனை தொடக்கம் – கூட்டுறவுத் துறை அமைச்சர் காந்தியராஜ் தொடங்கி வைத்தார்
ராணிப்பேட்டை மாவட்டம்:
ராணிப்பேட்டை மாவட்டம், அரக்கோணம் அடுத்த கயினூர் பகுதியில் கூட்டுறவுத் துறை சார்பில் தீபாவளி பண்டிகையை முன்னிட்டு சிறப்பு மளிகை தொகுப்பு விற்பனை மற்றும் கூட்டுறவு பட்டாசு விற்பனை தொடக்க விழா நடைபெற்றது.
இதில் கூட்டுறவுத் துறை அமைச்சர் காந்தியராஜ் மற்றும் மாவட்ட ஆட்சியர் பிரியா ரவிச்சந்திரன் ஆகியோர் பங்கேற்று, கூட்டுறவு பட்டாசு விற்பனை கடை மற்றும் மளிகை விற்பனை மையங்களை ரிப்பன் வெட்டி திறந்து வைத்தனர்.
தொடர்ந்து, பொதுமக்களுக்கு ரூ.200 மதிப்பிலான சிறப்பு மளிகை தொகுப்புகளை வழங்கி விற்பனையை தொடங்கி வைத்ததுடன், பட்டாசு பெட்டகங்களையும் வாடிக்கையாளர்களுக்கு வழங்கினர்.
இதனைத் தொடர்ந்து அமைச்சர் மற்றும் மாவட்ட ஆட்சியர் ஆகியோர் சிறுவர்கள் மற்றும் பொதுமக்களுடன் இணைந்து மத்தாப்பு, பூந்தொட்டிகளை கொளுத்தி தீபாவளி கொண்டாடினர். மேலும், பொதுமக்களுக்கு தீபாவளி நல்வாழ்த்துக்களையும் தெரிவித்தனர்.
தீபாவளி பண்டிகையின்போது பட்டாசுகளை பாதுகாப்பான முறையில் வெடிக்க வேண்டும் என்றும், விபத்துகளைத் தவிர்க்க உரிய முன்னெச்சரிக்கை நடவடிக்கைகளை கடைப்பிடிக்க வேண்டும் என்றும் மாவட்ட ஆட்சியர் பொதுமக்களுக்கு விழிப்புணர்வு ஏற்படுத்தினார்.
