ஆன்மீகப் புகழ்பெற்ற திருச்சி சமயபுரம் மாரியம்மன் திருக்கோயிலில், உலகப்புகழ் பெற்ற பூச்சொரிதல் பெருவிழா வரும் மார்ச் 8-ம் தேதி கோலாகலமாகத் தொடங்க உள்ளது. ஆண்டுதோறும் மாசி மாத கடைசி ஞாயிறு தொடங்கி, பங்குனி மாத இறுதி வரை நான்கு வாரங்கள் நடைபெறும் இந்த விழாவில், குறிப்பாக முதல் வாரம் நடைபெறும் பூச்சொரிதல் விழா மிகவும் விமரிசையாகக் கொண்டாடப்படும். அன்றைய தினம் திருச்சி மற்றும் அண்டை மாவட்டங்களில் இருந்து ஆயிரக்கணக்கான பக்தர்கள் மின் விளக்குகளால் அலங்கரிக்கப்பட்ட வாகனங்களில், தாரை தப்பட்டை முழங்கப் பல டன் மலர்களை ஊர்வலமாகக் கொண்டு வந்து விடிய விடிய அம்மனுக்குச் சாற்றி வழிபாடு நடத்துவது வழக்கம். பக்தர்களின் பாதுகாப்பான வருகைக்காக அன்றைய தினம் திருச்சி – சென்னை தேசிய நெடுஞ்சாலையில் பெரம்பலூர் வரை போக்குவரத்து முற்றிலுமாக மாற்றி அமைக்கப்படுவது நடைமுறையில் உள்ளது.
இந்நிலையில், இதே மார்ச் 8-ம் தேதியன்று சமயபுரம் அருகேயுள்ள சிறுகனூரில் திமுகவின் பிரம்மாண்ட மாநில மாநாடு நடைபெறும் என ஏற்கனவே அறிவிக்கப்பட்டுள்ளது. இதற்கான பந்தல்கால் நடும் விழா நேற்று முன்தினம் நடைபெற்று, பணிகள் மிகத் தீவிரமாக முடுக்கிவிடப்பட்டுள்ளன. ஒரே நாளில் லட்சக்கணக்கான பக்தர்கள் குவியும் பூச்சொரிதல் விழாவும், பல்லாயிரக்கணக்கான தொண்டர்கள் பங்கேற்கும் அரசியல் மாநாடும் ஒரே பகுதியில் நடைபெற இருப்பதால், திருச்சி – சென்னை தேசிய நெடுஞ்சாலை போக்குவரத்து ஸ்தம்பிக்கும் அபாயம் ஏற்பட்டுள்ளது. இதனால் பக்தர்கள் மற்றும் பொதுமக்கள் மத்தியில் பெரும் கவலை எழுந்துள்ளது.
இது தொடர்பாகக் கோயில் நிர்வாகம் தரப்பில் கூறுகையில், பூச்சொரிதல் விழா தேதி குறித்து மாவட்ட ஆட்சியர் மற்றும் அமைச்சர் கே.என்.நேரு ஆகியோரிடம் விரிவாகத் தெரிவிக்கப்பட்டுள்ளதாகவும், பக்தர்களின் நலன் கருதி அவர்கள் ஒரு நல்ல முடிவை எடுப்பார்கள் என நம்புவதாகவும் தெரிவித்துள்ளனர். இதுகுறித்து திமுக தரப்பில் விசாரித்தபோது, மாநாடு நடைபெறும் அதே தேதியில் ஆன்மீகத் திருவிழாவும் வருவதால், போக்குவரத்து நெரிசல் மற்றும் பொதுமக்களின் சிரமத்தைத் தவிர்க்கும் வகையில் மாநாட்டின் தேதியை மாற்றி அமைப்பது குறித்துக் கட்சித் தலைமைக்குப் பரிந்துரைக்கப்பட்டுள்ளதாகத் தெரிகிறது. அநேகமாகப் பொதுமக்களின் நலன் கருதி திமுக மாநாடு தேதி மாற்றப்பட அதிக வாய்ப்புள்ளதாக அரசியல் மற்றும் ஆன்மீக வட்டாரங்களில் பரபரப்பாகப் பேசப்பட்டு வருகிறது.
