சென்னை: அதிமுகவின் முன்னாள் மூத்த அமைச்சர் செங்கோட்டையன் தமிழக வெற்றிக் கழகத்தில் இன்று இணைந்ததைப் பற்றிய கேள்விக்கு, பொதுச்செயலாளர் எடப்பாடி கே. பழனிசாமி எதிர்பாராத விதமாக, “என்னிடம் ஏன் கேட்டீர்கள்? அவரிடமே போய் கேளுங்கள்” என்று பதிலளித்துள்ளார்.
அதிமுக தொடக்கம் முதல் அக்கட்சியில் பல்வேறு பதவிகளில் செயல்பட்டு வந்த செங்கோட்டையன், அண்மையில் கட்சிக்குள் ஏற்பட்ட கருத்து வேறுபாடுகள், நீக்கப்பட்ட நிர்வாகிகளுடன் அவர் நடத்திய சந்திப்புகள் உள்ளிட்ட காரணங்களால் அதிமுகவிலிருந்து நீக்கப்பட்டார். இதைத் தொடர்ந்து, பாஜக அல்லது திமுகவுக்கு செல்லக்கூடும் என்ற ஊகங்கள் உருவான நிலையில், நேற்றிரவு தனது எம்.எல்.ஏ. பதவியையும் ராஜினாமா செய்தார்.
இன்று காலை, பனையூரில் உள்ள தவெக அலுவலகத்தில், கட்சி தலைவர் விஜய் முன்னிலையில் செங்கோட்டையன் அதிகாரப்பூர்வமாக தவெகவில் இணைந்தார். இதே நேரத்தில், ஈரோடு மாவட்டத்தைச் சேர்ந்த பல ஆதரவாளர்களும் தவெகவில் சேர்ந்து கொண்டனர். அவருக்கு புதிய நிர்வாக பொறுப்புகளாக தலைமை ஒருங்கிணைப்பாளர் மற்றும் நான்கு மாவட்டங்களுக்கு அமைப்பு பொது செயலாளர் பதவிகள் வழங்கப்பட்டதாகத் தகவல்கள் தெரிவிக்கின்றன.
செங்கோட்டையன் இணைந்ததைத் தொடர்ந்து, மதுரையில் செய்தியாளர்கள் எடப்பாடி பழனிசாமியிடம் இந்த மாற்றம் குறித்து கேள்வி எழுப்பினர். அதற்கு EPS மிகக் குறுகிய மற்றும் நேரடியான பதிலாக, “அவரை போய் கேளுங்க!” என்று கூறினார்.
