வளப்பாற்றில் தண்ணீர் வராமல் 10000 ஏக்கர் சம்பா நெல் பயிர்கள் கருகி வருவதை கண்டித்து கூடுதல் தண்ணீர் திறக்க வலியுறுத்தி திருவாரூர் மாவட்ட ஆட்சியரை சந்தித்து விவசாயிகள் கோரிக்கை மனு.
திருவாரூர் மாவட்டத்தில் தற்பொழுது ஒரு லட்சத்து ஐம்பதாயிரம் ஏக்கர் பரப்பளவில் சம்பா நெல் சாகுபடி பணிகளில் விவசாயிகள் ஈடுபட்டு வருகின்றனர். இந்த நிலையில் நன்னிலம் தாலுகாவிற்கு உட்பட்ட சொரக்குடி, மூங்கில்குடி, காக்கா கோட்டூர், ஓமக்குளம், குவளைக்கால், ஆனைகுப்பம், விசலூர், நடுவச்சேரி, மகிழஞ்சேரி, மூலங்குடி உள்பட 20க்கும் மேற்பட்ட கிராமங்களில் பத்தாயிரம் ஏக்கர் பரப்பளவில் சம்பா நெல் சாகுபடி பணிகளில் விவசாயிகள் ஈடுபட்டுள்ளனர்.
இந்த நிலையில் பயிர் தெளித்து 25 நாட்கள் கடந்த நிலையில் இதுவரை வளப்பாற்றில் தண்ணீர் குறைந்த அளவு வருகின்ற காரணத்தினாலும், பருவமழை சரிவரப் பெய்யாத காரணத்தினாலும், மின்சாரம் சரிவர வராத காரணத்தினாலும், சம்பா நெல் பயிர்களுக்கு தண்ணீர் வைக்க முடியாமல் நெல் பயிர்கள் வயலிலே மடித்து போய்விட்டதாகவும், ஒரு ஏக்கருக்கு இதுவரை 8 ஆயிரம் ரூபாய் செலவு செய்துள்ள நிலையில் நெல் பயிர்களை காப்பாற்ற முடியவில்லை என விவசாயிகள் வேதனை தெரிவித்துள்ளனர்.
இந்த நிலையில் அப்பகுதியைச் சேர்ந்த 50-க்கும் மேற்பட்ட விவசாயிகள் திருவாரூர் மாவட்ட ஆட்சியர் அலுவலகத்திற்கு வருகை தந்து மாவட்ட ஆட்சியர் மோகனசந்திரனை நேரில் சந்தித்து பாதிக்கப்பட்ட விவசாயிகளுக்கு உரிய இழப்பீடு வழங்க வேண்டும். மேலும் வளப்பாறு மற்றும் புத்தாறு ஆகிய ஆறுகளில் கூடுதல் தண்ணீர் திறக்க வேண்டும் என கோரிக்கை விடுத்துள்ளனர்.
மேலும் விதை நெல் மற்றும் உழவு செய்வதற்கு ஏற்படும் செலவினங்களை அரசே ஏற்க வேண்டும், பருவத்தில் ஏற்கனவே ஏற்பட்ட செலவினங்களுக்கு உரிய நிவாரணம் வழங்க வேண்டும், 50 ஏக்கர் பரப்பிற்கு ஒரு ஆழ்துளை கிணறு அமைத்து நீர் ஆதாரம் கிடைக்க வழிவகை செய்ய வேண்டும், விவசாயிகள் பெற்ற அனைத்து வகை கடன்களையும் ரத்து செய்ய வேண்டும் என உள்ளிட்ட பல்வேறு கோரிக்கைகளை வலியுறுத்தி மனு அளித்தனர்.
பேட்டி : சரவணன் மற்றும் வெங்கடேசன் விவசாயிகள்
