தமிழக அரசியல் களம் தேர்தல் ஜூரத்தினால் சூடுபிடித்துள்ள நிலையில், மாமல்லபுரத்தில் நடைபெற்ற தமிழக வெற்றிக் கழகத்தின் (தவெக) விழாவில் அக்கட்சியின் தலைவர் விஜய் ஆற்றிய உரை பெரும் அரசியல் அதிர்வலைகளை ஏற்படுத்தியுள்ளது. அந்த உரையில், வரும் சட்டமன்றத் தேர்தலில் ஒரு பக்கம் தவெக அணி, மறுபக்கம் திமுக தலைமையிலான கூட்டணி, மற்றொரு பக்கம் பாஜக தலைமையிலான மற்றும் பல கட்சிகள் என அவர் குறிப்பிட்டிருந்தார். விஜய்யின் இந்தப் பேச்சு, அதிமுக கட்சி பாஜகவின் தலைமையின்கீழ் இயங்குவதாகப் பொருள்படும் வகையில் அமைந்திருந்தது. விஜய்யின் இந்த மறைமுக விமர்சனத்திற்கு அதிமுகவின் பொருளாளரும், முன்னாள் அமைச்சருமான திண்டுக்கல் சி.சீனிவாசன் சென்னையில் நேற்று செய்தியாளர்களைச் சந்தித்தபோது மிகக் கடுமையான பதிலடியைக் கொடுத்தார்.
அதிமுகவின் நிலைப்பாடு குறித்துத் தெளிவுபடுத்திய திண்டுக்கல் சீனிவாசன், “மத்திய உள்துறை அமைச்சர் அமித் ஷா தமிழகம் வந்திருந்தபோதே, தமிழகத்தில் தேசிய ஜனநாயகக் கூட்டணிக்குத் தலைமை தாங்கும் கட்சி அதிமுகதான் என்பதையும், அந்தக் கூட்டணிக்கு எடப்பாடி பழனிசாமிதான் தலைவர் என்பதையும் மிகத் தெளிவாக அறிவித்துவிட்டார். மேலும், எதிர்வரும் சட்டமன்றத் தேர்தலுக்கான முதல்வர் வேட்பாளர் எடப்பாடி பழனிசாமிதான் என்பதிலும் எந்தவிதமான ஐயப்பாடும் இல்லை” என்று திட்டவட்டமாகத் தெரிவித்தார். அதிமுக யாருக்கும் அடிமையாக இருக்க வேண்டிய அவசியம் இல்லை என்று குறிப்பிட்ட அவர், விஜய்யின் அரசியல் நிலைப்பாட்டில் உள்ள முரண்பாடுகளைச் சுட்டிக்காட்டினார்.
தொடர்ந்து பேசிய திண்டுக்கல் சீனிவாசன், தவெக தலைவர் விஜய்க்கு ஒரு முக்கியமான கேள்வியை முன்வைத்தார். “அரசியலுக்கு வந்த ஆரம்பக்கட்டத்தில் திமுக மற்றும் அதிமுகவை ஊழல் கட்சிகள் என்றும், பாஜகவை கொள்கை ரீதியிலான பொது எதிரி என்றும் பேசிவந்த விஜய், சிபிஐ (CBI) விசாரணைக்குச் சென்று திரும்பிய பிறகு பாஜகவைச் சொல்ல வேண்டிய இடத்தில் கூட விமர்சிக்காமல் அமைதி காப்பது ஏன்?” என்று கேள்வி எழுப்பினார். இந்தத் திடீர் மாற்றத்திற்கான காரணத்தை விஜய் தமிழக மக்களுக்கு விளக்க வேண்டும் என்றும் அவர் வலியுறுத்தினார். விஜய்யின் பேச்சுக்கும், அதிமுகவின் இந்த அதிரடிப் பதிலடிக்கும் இடையே தமிழக அரசியல் களம் தற்போது பெரும் விவாத மேடையாக மாறியுள்ளது.
