ஆசியக் கோப்பை கிரிக்கெட் தொடர் நேற்று ஹாங்காங் – ஆப்கானிஸ்தான் அணிகள் மோதலுடன் துவங்கியது. அதில் ஆப்கானிஸ்தான் அணி வெற்றியைப் பெற்றது.
இந்நிலையில், 8 முறை சாம்பியன் பட்டம் வென்ற இந்திய அணி இன்று தனது முதல் ஆட்டத்தில் ஐக்கிய அரபு அமீரக அணியை எதிர்கொள்கிறது. துபாயில் நடைபெறும் இந்தப் போட்டி இரவு 8 மணிக்கு தொடங்குகிறது. சூர்யகுமார் யாதவ் தலைமையில் இந்திய அணி களமிறங்குகிறது. மறுபுறம், முஹமது வாசீம் தலைமையிலான UAE அணி இந்திய அணிக்கு எவ்வளவு சவால் விடுப்பது என்பது ஆவலாக எதிர்பார்க்கப்படுகிறது.
இந்திய அணியின் அசல் அணி அமைப்பில் சில சுவாரஸ்யங்கள் காணப்படுகின்றன. தொடக்க வீரர்களாக சுப்மன் கில் மற்றும் அபிஷேக் ஷர்மா களமிறங்குவார்கள் என எதிர்பார்க்கப்படுகிறது. மத்திய வரிசையில் கேப்டன் சூர்யகுமார் யாதவ், திலக் வர்மா, ஆல்ரவுண்டர்கள் அக்ஷர் படேல் மற்றும் ஹர்திக் பாண்ட்யா ஆகியோர் அணிக்கு வலுசேர்க்கவுள்ளனர். அதிரடி ஆட்டக்காரர் ரிங்கு சிங் ஆடும் பதினொன்றில் இடம்பெற வாய்ப்புள்ளது.
விக்கெட் கீப்பர் சஞ்சு சாம்சன் இல்லாத நிலையில், ஜிதேஷ் ஷர்மா களமிறக்கப்படுவார் என செய்திகள் தெரிவிக்கின்றன. பந்துவீச்சுப் பிரிவில் ஜஸ்ப்ரீத் பும்ரா, அர்ஷ்தீப் சிங் ஆகியோர் வேகப்பந்து வீச்சை கவனிக்கிறார்கள். சுழற்பந்து வீச்சில் குல்தீப் யாதவ் இடம்பெற வாய்ப்பு உள்ளது. ஒருவேளை, அவருக்குப் பதிலாக வருண் சக்ரவர்த்திக்கும் வாய்ப்பு கிடைக்கலாம் என தெரிவிக்கப்படுகிறது.
மொத்தத்தில், அனுபவமிக்க இந்திய அணியும், வளர்ந்து வரும் UAE அணியும் மோதும் இன்றைய ஆட்டம் கிரிக்கெட் ரசிகர்களிடையே பெரும் எதிர்பார்ப்பை ஏற்படுத்தியுள்ளது.
