விழுப்புரம்: நடிகர் விஷால் மீண்டும் உடல்நலக்குறைவால் மயங்கி விழுந்த சம்பவம் திரையுலகத்திலும் ரசிகர்களிடையிலும் பெரும் அதிர்ச்சியை ஏற்படுத்தியுள்ளது.
சமீபத்தில் சுந்தர் சி இயக்கத்தில் விஷால் நடித்த “மத கஜ ராஜா” திரைப்படம் 12 ஆண்டுகளுக்கு பிறகு பொங்கல் வெளியீடாக திரைக்கு வந்து, நல்ல வரவேற்பையும் வசூலையும் பெற்றது. இப்படத்தின் ப்ரீ ரிலீஸ் விழாவில் கலந்து கொண்ட விஷால், மேடையில் கைகள் நடுங்கியபடி, மோசமான உடல்நிலையில் பேசியதைக் பார்வையாளர்கள் கவனித்தனர். இது சமூக வலைதளங்களில் பரவலாக பேசப்பட்ட நிலையில், அவருடைய உடல்நிலை குறித்து பல யூடியூப் சேனல்கள் தவறான தகவல்களை பரப்பின. இதற்கு எதிராக விஷால் தரப்பில் சட்ட நடவடிக்கையும் எடுக்கப்பட்டது.
இந்நிலையில், விழுப்புரம் மாவட்டத்தில் கூவாகம் திருவிழாவை முன்னிட்டு நடைபெற்ற “மிஸ் திருநங்கை” அழகி போட்டியில் சிறப்பு விருந்தினராக கலந்து கொண்ட நடிகர் விஷால், மேடையில் உரையாற்றிய பிறகு கிளம்பும்போது, திடீரென மயங்கி விழுந்தார். உடனடியாக அவரை அங்கிருந்தவர்கள் தூக்கிச் சென்று சிகிச்சை அளிக்கப்பட்டது.
முன்பே உடல்நலக்குறைவால் பாதிக்கப்பட்டிருந்த விஷால், தற்போது மீண்டும் மயங்கி விழுந்த சம்பவம் அவரது ரசிகர்கள் மற்றும் திரை உலகில் பரபரப்பை ஏற்படுத்தியுள்ளது. விஷாலின் தற்போதைய உடல்நிலை குறித்து அதிகாரப்பூர்வ தகவல் வெளியாகவில்லை.
