கோவை மாவட்டம் வால்பாறை மலைப்பகுதியில் நிலவும் பசுமையான சூழல் மற்றும் அடர்ந்த வனப்பகுதிகள் காரணமாக, தேயிலை எஸ்டேட்களில் காட்டு யானைகளின் நடமாட்டம் நாளுக்கு நாள் அதிகரித்து வருகிறது. குறிப்பாக உருளிக்கல், சிறுகுன்றா, வில்லோனி, ஷேக்கல்முடி, சங்கிலிரோடு மற்றும் பன்னிமேடு உள்ளிட்ட பகுதிகளில் நூற்றுக்கணக்கான யானைகள் சிறு சிறு கூட்டங்களாகப் பிரிந்து முகாமிட்டுள்ளன. இந்த யானைகள் பகல் நேரங்களில் எஸ்டேட்டை ஒட்டியுள்ள வனப்பகுதிகளில் தங்குவதும், இரவு நேரங்களில் தொழிலாளர் குடியிருப்புப் பகுதிகளுக்குள் புகுந்து சேதங்களை விளைவிப்பதும் தொடர்கதையாகி வருகிறது. இதில் ஒரு பகுதியாக, குரங்குமுடி எஸ்டேட் பகுதியில் கடந்த இரண்டு மாதங்களாக முகாமிட்டுள்ள ஒரு ‘ஒற்றை யானை’, இப்பகுதி மக்களிடையே பெரும் பீதியை ஏற்படுத்தியுள்ளது.
வழக்கமாக யானைக்கூட்டங்கள் ஒரு குறிப்பிட்ட எஸ்டேட் பகுதியில் சில நாட்கள் தங்கிவிட்டு, பின்னர் உணவு மற்றும் தண்ணீரைத் தேடி வேறு பகுதிகளுக்கு இடம்பெயர்ந்துவிடும். ஆனால், தற்போது குரங்குமுடி எஸ்டேட் பகுதிகளில் உலவி வரும் இந்த ஒற்றை யானை, கடந்த 60 நாட்களுக்கும் மேலாக அங்கேயே நிரந்தரமாக முகாமிட்டுள்ளது. குறிப்பாக முருகன் எஸ்டேட், ஸ்ரீராம் மற்றும் சிவா காபி எஸ்டேட் பகுதிகளில் இந்த யானையின் நடமாட்டம் அதிகமாக உள்ளது. பகல் நேரங்களில் தொழிலாளர்கள் தேயிலை பறிக்கச் செல்லும் பாதைகளிலும், தேயிலைச் செடிகளுக்கு இடையிலும் இந்த யானை மறைந்து நிற்பதால், தொழிலாளர்கள் பணிக்குச் செல்ல முடியாமல் தங்களது வாழ்வாதாரத்தை இழந்து தவித்து வருகின்றனர்.
இது குறித்துக் கவலையுடன் தெரிவிக்கும் எஸ்டேட் தொழிலாளர்கள், “ஒற்றை யானையின் நடமாட்டத்தால் அதிகாலை மற்றும் அந்தி சாயும் நேரங்களில் வீட்டை விட்டு வெளியே வரக்கூட அஞ்ச வேண்டியுள்ளது. மற்ற யானைகள் இடம்பெயர்ந்து சென்றாலும், இந்த ஒற்றை யானை மட்டும் இங்கேயே முகாமிட்டிருப்பது எங்களுக்குப் பெரும் அச்சுறுத்தலாக உள்ளது. எந்நேரத்தில் எங்கு இருக்கும் என்றே தெரியாததால் உயிருக்கு அஞ்சி வாழ வேண்டியுள்ளது,” எனத் தெரிவித்தனர். எனவே, அசம்பாவிதங்கள் ஏதும் நடக்கும் முன்பாக, வனத்துறை அதிகாரிகள் உடனடியாகத் தலையிட்டு இந்த ஒற்றை யானையின் நடமாட்டத்தைக் கண்காணிக்க வேண்டும் என்றும், அதனைப் பிடித்து அடர்ந்த வனப்பகுதிக்குள் அல்லது வேறு பகுதிக்குக் கொண்டு சென்று விட வேண்டும் என்றும் இப்பகுதி மக்கள் கோரிக்கை விடுத்துள்ளனர்.
