தேனி மாவட்டம் பெரியகுளம் தென்கரை பேரூராட்சி மக்களின் நீண்ட கால குடிநீர் தேவையை பூர்த்தி செய்யும் வகையில், மத்திய மற்றும் மாநில அரசுகளின் கூட்டுத் திட்டமான அம்ரூத் 2.0 (AMRUT 2.0) திட்டத்தின் கீழ் சுமார் 12 கோடியே 40 லட்சம் ரூபாய் மதிப்பீட்டில் பிரம்மாண்ட குடிநீர் மேம்பாட்டுப் பணிகள் முடிக்கப்பட்டுள்ளன. இந்தப் புதிய குடிநீர் விநியோகத் திட்டத்தை தமிழக முதலமைச்சர் மு.க. ஸ்டாலின் அவர்கள் சென்னையில் இருந்தபடி காணொளி காட்சி வாயிலாகப் பொதுமக்களின் பயன்பாட்டிற்கு அதிகாரப்பூர்வமாகத் தொடங்கி வைத்தார். இந்தப் புதிய திட்டத்தின் மூலம் தென்கரை பேரூராட்சிக்கு உட்பட்ட அனைத்து வார்டுகளிலும் தடையின்றி, சீரான முறையில் பாதுகாக்கப்பட்ட குடிநீர் வழங்கப்பட உள்ளது. இதனைத் தொடர்ந்து பெரியகுளத்தில் நடைபெற்ற உள்ளூர் நிகழ்வில், தென்கரை பேரூராட்சித் தலைவர் நாகராஜன் தலைமை தாங்கி, குத்துவிளக்கேற்றி புதிய திட்டப் பணிகளை முறைப்படி தொடங்கி வைத்தார்.
பெருகி வரும் மக்கள் தொகைக்கு ஏற்ப, வரும் காலங்களில் குடிநீர் தட்டுப்பாடு ஏற்படாத வண்ணம் அதிநவீன நீரேற்று நிலையங்கள் மற்றும் கூடுதல் கொள்ளளவு கொண்ட மேல்நிலை நீர்த்தேக்கத் தொட்டிகள் இத்திட்டத்தின் கீழ் அமைக்கப்பட்டுள்ளன. இந்த விழாவில் தென்கரை பேரூராட்சி வார்டு கவுன்சிலர் தேவராஜ், துணைத் தலைவர் ராதா ஆகியோர் முன்னிலை வகித்தனர். மேலும், செயல் அலுவலர் (பொறுப்பு) சுருளி வேல் மற்றும் உதவி செயற்பொறியாளர் மணிமாறன் ஆகியோர் திட்டத்தின் தொழில்நுட்ப அம்சங்கள் மற்றும் விநியோக முறைகள் குறித்து விளக்கினர். இந்நிகழ்வில் பேரூராட்சிப் பணியாளர்கள், முக்கியப் பிரமுகர்கள் மற்றும் திரளான பொதுமக்கள் கலந்து கொண்டு அரசின் இந்த மக்கள் நலத் திட்டத்திற்குத் தங்களது நன்றிகளைத் தெரிவித்துக் கொண்டனர். கோடை காலம் தொடங்கவுள்ள நிலையில், ரூ.12.40 கோடி மதிப்பீட்டிலான இந்த மெகா குடிநீர் திட்டம் பயன்பாட்டிற்கு வந்துள்ளது பெரியகுளம் பகுதி மக்களிடையே பெரும் மகிழ்ச்சியையும், வரவேற்பையும் ஏற்படுத்தியுள்ளது.,
