கோவை மாவட்ட சமூக நலன் மற்றும் மகளிர் உரிமைத் துறை சார்பில், ஒருங்கிணைந்த குழந்தை வளர்ச்சிப் பணிகள் திட்டத்தின் கீழ், வால்பாறை வட்டாரத்தைச் சேர்ந்த நூறு கர்ப்பிணிப் பெண்களுக்குச் சமுதாய வளைகாப்பு விழா வால்பாறை நகராட்சி சமுதாயக் கூடத்தில் மிகச் சிறப்பாக நடைபெற்றது. தாய்மையைப் போற்றும் வகையிலும், ஏழை எளிய கர்ப்பிணிப் பெண்களுக்கு ஊட்டச்சத்து மற்றும் விழிப்புணர்வை ஏற்படுத்தும் நோக்கிலும் இந்த விழா மாவட்ட நிர்வாகத்தின் வழிகாட்டுதலின்படி ஒருங்கிணைக்கப்பட்டது.
நிகழ்ச்சிக்கு வால்பாறை வட்டாரக் குழந்தை வளர்ச்சித் திட்ட அலுவலர் ரா. வீணா வரவேற்புரை ஆற்றினார். விழாவில் சிறப்பு அழைப்பாளராகக் கலந்துகொண்ட வால்பாறை நகரச் செயலாளர் குட்டி (எ) சுதாகர், ஆரோக்கியமான தலைமுறையை உருவாக்குவதில் கர்ப்பிணிப் பெண்களின் ஆரோக்கியம் எவ்வளவு முக்கியம் என்பது குறித்து உரையாற்றினார். வால்பாறை நகர மன்றத் தலைவர் அழகு சுந்தரவள்ளி தலைமை தாங்கி, அரசு வழங்கும் மகப்பேறு நலத்திட்டங்கள் குறித்து விளக்கமளித்தார். விழாவில் பங்கேற்ற 100 கர்ப்பிணிப் பெண்களுக்கும் பாரம்பரிய முறைப்படி சந்தனம், குங்குமம் இட்டு, கைகளில் வளையல்கள் அணிவிக்கப்பட்டன. அவர்களுக்குத் தேவையான சத்தான தானியங்கள், பழங்கள் உள்ளிட்ட சீர்வரிசைப் பொருட்கள் அடங்கிய தொகுப்புகள் வழங்கப்பட்டன. வெறும் விழாவாக மட்டும் அமையாமல், பெண்களின் ஆரோக்கியத்தை உறுதி செய்யும் வகையில் வட்டார மருத்துவ அலுவலர் பாபு லட்சுமணன் தலைமையில் மருத்துவப் பரிசோதனைகள் மேற்கொள்ளப்பட்டன.
ஒவ்வொரு பெண்ணுக்கும் எடை, ரத்த அழுத்தம் மற்றும் உயரம் உள்ளிட்ட பரிசோதனைகள் செய்யப்பட்டு, கர்ப்ப காலத்தில் எடுத்துக்கொள்ள வேண்டிய சரிவிகித உணவு மற்றும் உடற்பயிற்சிகள் குறித்து மருத்துவர்கள் ஆலோசனைகளை வழங்கினர். ‘எண்ணம் போல் வாழ்க்கை’ அறக்கட்டளையின் நிறுவனர் எஸ்.ஏ.ஐ. நெல்சன், வட்டார ஒருங்கிணைப்பாளர் அனிஷ் மற்றும் நகர மன்ற உறுப்பினர்கள் இவ்விழாவில் கலந்துகொண்டு சிறப்பித்தனர்.
நிகழ்ச்சியின் நிறைவாக, வளைகாப்பு விருந்துடன் அறுசுவை உணவு அனைவருக்கும் வழங்கப்பட்டது. குழந்தைகள் வளர்ச்சித் திட்ட மேற்பார்வையாளர்கள், அங்கன்வாடிப் பணியாளர்கள், மருத்துவப் பணியாளர்கள் மற்றும் நகராட்சி ஊழியர்கள் இந்த விழாவுக்கான ஏற்பாடுகளைச் செய்திருந்தனர். அரசு சார்பில் நடத்தப்பட்ட இந்தச் சமுதாய வளைகாப்பு, வால்பாறை மலைப்பகுதி மக்களிடையே பெரும் நெகிழ்ச்சியை ஏற்படுத்தியது.
