ராமநாதபுரம் மாவட்டம் ஆர்.எஸ்.மங்கலம் தாலுகா, காவனூர் ஊராட்சியைச் சேர்ந்த நாகனேந்தல் கிராம மக்கள், தங்களது ஊரில் நிலவும் அடிப்படை வசதிக் குறைபாடுகளைக் கண்டித்து மாவட்ட ஆட்சியர் அலுவலகத்தில் இன்று நடைபெற்ற குறைதீர்க்கும் முகாமில் திரளாக வந்து மனு அளித்தனர். 250-க்கும் மேற்பட்ட குடும்பங்கள் வசிக்கும் இந்தக் கிராமத்தில், முறையான சாலை வசதி இல்லாததாலும், காவிரி கூட்டுக்குடிநீர் தட்டுப்பாட்டாலும் மக்களின் இயல்பு வாழ்க்கை முற்றிலுமாக முடங்கியுள்ளது. இந்தப் புறக்கணிப்பால் ஆத்திரமடைந்த நூற்றுக்கும் மேற்பட்ட கிராம மக்கள், மாவட்ட நிர்வாகம் உடனடியாகத் தலையிட்டுத் தங்களது துயரத்தைப் போக்க வேண்டும் என வலியுறுத்தினர்.
நாகனேந்தல் கிராமத்தினர் முன்வைக்கும் முக்கியக் குற்றச்சாட்டு, காவிரி கூட்டுக் குடிநீர் வழங்கப்படாததே ஆகும். இக்கிராமத்திற்குச் சுத்தமான குடிநீர் விநியோகம் நிறுத்தப்பட்டுப் பல மாதங்கள் ஆவதால், மக்கள் வேறு வழியின்றித் தனியார் லாரிகளில் ஒரு குடம் 15 ரூபாய் கொடுத்து வாங்கும் நிலைக்குத் தள்ளப்பட்டுள்ளனர். வசதி இல்லாத ஏழை மக்கள், அருகிலுள்ள ஊருணிகளில் தேங்கிக் கிடக்கும் அசுத்தமான தண்ணீரையே குடிப்பதற்கும் சமைப்பதற்கும் பயன்படுத்துகின்றனர். இது ஒருபுறமிருக்க, கிழக்கு கடற்கரைச் சாலையிலிருந்து நாகனேந்தல் கிராமத்திற்குள் வரும் பிரதானச் சாலை முற்றிலும் சிதைந்து, ஆங்காங்கே பெரிய பள்ளங்கள் ஏற்பட்டுப் போக்குவரத்திற்கு லாயக்கற்ற நிலையில் உள்ளது. சாலையின் அவல நிலையால் அவசரத் தேவைகளுக்குக் கூட ஆம்புலன்ஸ் அல்லது ஆட்டோக்கள் ஊருக்குள் வர மறுப்பதாக மக்கள் வேதனையுடன் தெரிவிக்கின்றனர்.
போக்குவரத்து வசதியைப் பொறுத்தவரை, தினமும் காலை 9:30 மணிக்கு ஒரே ஒருமுறை மட்டுமே அரசு டவுன் பஸ் வந்து செல்கிறது. பள்ளி, கல்லூரி மாணவர்கள் மற்றும் வேலைக்குச் செல்பவர்களுக்கு இந்த நேரம் துளிக்கூடப் பயன்படவில்லை. இதனால் மாணவர்கள், கர்ப்பிணிகள் மற்றும் முதியவர்கள் சுமார் 5 கிலோமீட்டர் தொலைவு வரை கரடுமுரடான பாதையில் நடந்து செல்ல வேண்டிய கட்டாயம் நிலவுகிறது. எனவே, காலை மற்றும் மாலை என இருவேளைகளிலும் முறையான பேருந்து சேவையை உறுதி செய்ய வேண்டும், புதிய தார்ச் சாலை அமைக்க வேண்டும் மற்றும் தடையின்றி காவிரி குடிநீர் வழங்க வேண்டும் என்ற கோரிக்கைகளை முன்வைத்துள்ளனர். இந்த மனுவைப் பெற்றுக்கொண்ட அதிகாரிகள், இது குறித்து ஆய்வு செய்து உரிய நடவடிக்கை எடுப்பதாக உறுதி அளித்தனர்.
