“மக்களுக்கு பிரச்சனை ஏற்பட்டால் அவர்களோடு நின்று அதை எதிர்கொள்ளும் துணிச்சல் இல்லாமல் ஓடி ஒளிவது, அரசியலுக்கே தகுதியற்ற செயல்” என்று நடிகரும் முக்குலத்தோர் புலிப்படை கட்சித் தலைவருமான கருணாஸ் கடுமையாக தெரிவித்தார்.
தஞ்சையில் நடைபெற்ற 224ஆம் ஆண்டு மருது பாண்டியர் நினைவு நாள் நிகழ்ச்சியில் கலந்து கொண்ட அவர், செய்தியாளர்களிடம் பேசுகையில், “மருது சகோதரர்கள் 1801ஆம் ஆண்டு ஜம்புத் தீவு பிரகடனத்தின் மூலம் ஜாதி, மதம் கடந்த ஒற்றுமையை உருவாக்கி, ஐரோப்பிய ஆட்சிக்கு எதிராக போராடினர். இன்று அதேபோல், நாட்டின் சுதந்திரத்திற்கே பங்கில்லை என்றாலும் அரசியலில் ஆதிக்கம் செலுத்தும் பாஜக மற்றும் ஆர்எஸ்எஸ் போன்ற அமைப்புகளை தமிழ்நாட்டிலிருந்து வெளியேற்ற வேண்டும் என்பதே நமது உறுதிமொழி” என கூறினார்.
அவர் மேலும் தொடர்ந்துகொண்டு, “மருது பாண்டியர் குடும்பத்தினர் மற்றும் அவர்களின் உறவினர்கள் உள்ளிட்ட 500 பேருக்கும் மேல் வெள்ளையர்களால் கொல்லப்பட்டனர். அந்த வீரர்களின் தியாகத்தை நினைவு கூர்ந்த நாளில், தமிழ்நாட்டை சங் பரிவாரங்களின் தாக்கத்திலிருந்து விடுவிக்க வேண்டும் என்று முக்குலத்தோர் புலிப்படை உறுதி எடுக்கிறது,” என்றார்.
அதையடுத்து, விஜய்யின் அரசியல் நடவடிக்கைகள் குறித்த கேள்விக்கு பதிலளித்த கருணாஸ், “சினிமா துறையிலிருந்து அரசியலுக்குவருவது தவறு அல்ல. எம்.ஜி.ஆர், ஜெயலலிதா போன்றோர் அதற்கு சிறந்த எடுத்துக்காட்டுகள். ஆனால் மக்களுக்காக அரசியலுக்குவரும் ஒருவர், மக்களின் துயரங்களில் அவர்களோடு நிற்கத் தெரியாவிட்டால் அது அரசியலுக்கே அவமானம்.
கரூரில் 41 பேர் உயிரிழந்த பெரும் சம்பவம் நடந்தபோது விஜய் எடுத்த அணுகுமுறை பலருக்கும் ஏமாற்றத்தை ஏற்படுத்தியது. மக்களால் அரசியல் உருவாகும் போது, மக்களை விட்டு விலகுவது ஏற்றுக்கொள்ள முடியாது. பிரச்சினையிலிருந்து தப்பிக்கிறவர்கள் அதிகாரத்தை நோக்கி வருவது பொருத்தமல்ல,” என்று கடுமையாக விமர்சித்தார்.
