கொடுங்கையூர் குப்பைக் கிடங்கில் அடிப்படை வசதிகள் கோரி தொழிலாளர்கள் ஆர்ப்பாட்டம்
சென்னை, செப்.25:
சென்னை கொடுங்கையூர் குப்பைக் கிடங்கில் பணியாற்றும் குப்பை லாரி ஓட்டுநர்கள், ஜேசிபி இயந்திர ஓட்டுநர்கள் மற்றும் குப்பை அகற்றும் தொழிலாளர்கள், அடிப்படை வசதிகள் செய்து தரக் கோரி ஆர்ப்பாட்டத்தில் ஈடுபட்டனர்.
சென்னை மாநகராட்சியின் பல்வேறு பகுதிகளில் சேகரிக்கப்படும் குப்பைகள் கொடுங்கையூர் குப்பைக் கிடங்கிற்கு கொண்டு வரப்பட்டு, தரம் பிரிக்கப்பட்டு சேமிக்கப்பட்டு வருகிறது. இங்கு நூற்றுக்கும் மேற்பட்ட தொழிலாளர்கள் பல்வேறு பணிகளில் ஈடுபட்டு வருகின்றனர்.
குப்பைகளை லாரிகளில் கொண்டு வரும் ஓட்டுநர்கள், அவற்றை கிடங்கில் கொட்டுவதற்காக பல மணி நேரம் காத்திருக்க வேண்டிய நிலை உள்ளதாகவும், சில நேரங்களில் 4 முதல் 5 மணி நேரத்திற்கும் மேலாக காத்திருக்க வேண்டியுள்ளதாகவும் தெரிவித்தனர்.
மேலும், ஓட்டுநர்கள் மற்றும் தொழிலாளர்களுக்கு போதிய பாதுகாப்பு உபகரணங்கள் வழங்கப்படவில்லை என்றும், கிடங்கிற்குள் தரமான சாலை வசதிகள், குடிநீர் மற்றும் உணவு உள்ளிட்ட அடிப்படை வசதிகள் செய்து தரப்படவில்லை என்றும் குற்றம்சாட்டினர்.
இதனை வலியுறுத்தி, கம்யூனிஸ்ட் கட்சி சார்பில் கொடுங்கையூர் குப்பைக் கிடங்கின் பிரதான நுழைவாயில் முன்பு ஆர்ப்பாட்டம் நடைபெற்றது. இதில் நூற்றுக்கும் மேற்பட்ட குப்பை லாரிகள் நிறுத்தப்பட்டன. லாரி ஓட்டுநர்கள், ஜேசிபி இயந்திர ஓட்டுநர்கள் மற்றும் குப்பை அகற்றும் தொழிலாளர்கள் கலந்து கொண்டு, அடிப்படை வசதிகளை உடனடியாக செய்து தரக் கோரி கோஷங்களை எழுப்பினர்.
இந்தப் போராட்டத்தால் சென்னை மாநகரின் சில பகுதிகளில் குப்பை அகற்றும் பணிகள் தாமதமானதாகவும், இதனால் பொதுமக்களுக்கு பாதிப்பு ஏற்பட்டதாகவும் தெரிவிக்கப்பட்டுள்ளது.
பேட்டி:
சீனிவாசலு
சென்னை மாநகராட்சி செங்கொடி சங்கம் – பொதுச் செயலாளர்
