தஞ்சாவூர் மாவட்ட ஆட்சியர் அலுவலகக் கூட்டரங்கில் நடைபெற்ற தேசிய சிறுபான்மையினர் உரிமைகள் தின விழாவிற்கு, மாவட்ட ஆட்சியர் பா. பிரியங்கா பங்கஜம் தலைமை தாங்கினார். முன்னால் மத்திய நிதித்துறை இணை அமைச்சர் எஸ்.எஸ். பழநிமாணிக்கம், சட்டமன்ற உறுப்பினர்கள் துரை. சந்திரசேகரன், டி.கே.ஜி. நீலமேகம் மற்றும் தஞ்சை மாநகராட்சி மேயர் சண். ராமநாதன் ஆகியோர் முன்னிலை வகித்தனர். சிறுபான்மையின மக்களின் உரிமைகளைப் பாதுகாப்பதிலும், அவர்களின் பொருளாதார நிலையை உயர்த்துவதிலும் தமிழக அரசு காட்டி வரும் அக்கறையை விளக்கும் விதமாக இந்த விழா அமைந்தது.விழாவில் உரையாற்றிய ஆட்சியர் பிரியங்கா பங்கஜம், தஞ்சாவூர் மாவட்டத்தில் சிறுபான்மையினருக்காகச் செயல்படுத்தப்பட்டு வரும் திட்டங்கள் குறித்துப் பட்டியலிட்டார்:
உலமாக்கள் நல வாரியம்: மாவட்டத்தில் 557 உறுப்பினர்கள் பதிவு பெற்றுள்ளனர். உலமாக்கள் இருசக்கர வாகனம் வாங்க ரூ. 25,000 வரை மானியம் வழங்கப்படுகிறது.
மகளிர் மேம்பாடு: ஆதரவற்ற மற்றும் பொருளாதாரத்தில் பின்தங்கிய சிறுபான்மையின மகளிருக்கு மின் மோட்டாருடன் கூடிய விலையில்லா தையல் இயந்திரங்கள் வழங்கப்படுகின்றன. மேலும், மாவட்டத்தில் இரண்டு கிறித்துவ மகளிர் உதவும் சங்கங்கள் ஆட்சியர் தலைமையில் சிறப்பாகச் செயல்பட்டு வருகின்றன.
பொருளாதாரக் கடனுதவி: தமிழ்நாடு சிறுபான்மையினர் பொருளாதார மேம்பாட்டுக் கழகம் (TAMCO) மூலம் தனிநபர் கடன், சுயஉதவிக் குழு கடன் மற்றும் கல்வி கடன்கள் வழங்கப்படுகின்றன. நடப்பாண்டில் தஞ்சை மாவட்டத்திற்கு ரூ. 3.99 கோடி இலக்கு நிர்ணயிக்கப்பட்டு, நிதி ஒதுக்கீடு செய்யப்பட்டுள்ளது.
மேலும், சொந்தக் கட்டடங்களில் இயங்கும் தேவாலயங்களைப் புனரமைக்க நிதி உதவி வழங்கும் திட்டம் மற்றும் சீக்கிய, புத்த மதத்தினர் புனிதப் பயணம் மேற்கொள்ள நிதியுதவி வழங்கும் திட்டங்கள் குறித்தும் அவர் விளக்கினார். மாவட்டப் பிற்படுத்தப்பட்டோர் மற்றும் சிறுபான்மையினர் நல அலுவலர் ஸ்ரீதர் உட்படப் பல அரசு அதிகாரிகளும், சிறுபான்மையின அமைப்புகளின் நிர்வாகிகளும் இந்த நிகழ்வில் திரளாகக் கலந்து கொண்டனர். அரசின் இந்த நேரடித் தலையீடு சிறுபான்மையின மக்களின் சமூகப் பாதுகாப்பை உறுதி செய்யும் என விழாவில் பங்கேற்றவர்கள் நெகிழ்ச்சியுடன் தெரிவித்தனர்.
