பெங்களூருவில் ஆர்சிபி வெற்றிக்குப் பிறகு நடந்த பரிதாபமான கூட்டநெரிசல் ; நீதிமன்ற விசாரணை நடந்து வருகிறது
பெங்களூர் – 18 ஆண்டுகளுக்குப் பிறகு ராயல் சேலஞ்சர்ஸ் பெங்களூரு (RCB) ஐபிஎல் கோப்பை வென்ற மகிழ்ச்சியில் இருந்த நிலையில், வெற்றிக்குப் பிறகு நடந்த சம்பவம் ரசிகர்கள் மனதில் ஆழ்ந்த துயரத்தை ஏற்படுத்தியுள்ளது. வெற்றிக் கொண்டாட்டத்தில் ஏற்பட்ட கூட்டநெரிசல் காரணமாக 11 இளம் ரசிகர்கள் உயிரிழந்தது பெரும் அதிர்ச்சியைக் கிளப்பியுள்ளது.
இந்த துயர சம்பவத்திற்கு யார் பொறுப்பு என்பது தொடர்பாக அரசியல் வட்டாரத்தில் கடும் விவாதம் நடந்து வருகிறது. கூட்டத்தின் பாதுகாப்பு ஏற்பாடுகளில் பொறுப்பற்ற போக்கே உயிரிழப்புக்குக் காரணம் எனக் கூறப்படுகிறது.
பாதுகாப்பு தவறுகள் – யார் கவனிக்கவில்லை ?
ஜூன் 3ஆம் தேதி இரவு RCB அணியின் வெற்றியைத் தொடர்ந்து கர்நாடக மாநிலம் முழுவதும் ரசிகர்கள் திரண்டு கொண்டாடினர். வெற்றியின் அடுத்த நாள் பெங்களூருவில் திறந்தவெளிப் பேரணிக்குத் திட்டமிடப்பட்ட நிலையில், போலீசார் கூட்டநெரிசலை உணர்ந்து அனுமதி மறுத்திருந்தனர். எனினும், மாலை 6 மணிக்கு சின்னசாமி மைதானத்தில் பாராட்டு விழா நடைபெற்றது.
நிகழ்ச்சி தொடங்கும் முன்பே 4 மணிக்குள்ளாகவே கூட்ட நெரிசலில் பலரும் மயக்கமடைந்ததாக செய்திகள் வெளியாகின. பாதுகாப்பு ஏற்பாடுகள் போதியளவில் இல்லாததால் இந்த துயரம் ஏற்பட்டது என்பது உறுதி.
அரசியல் விமர்சனங்கள் – அரசாங்கத்துக்கும் பதிலுக்கேடுகள்
துணை முதல்வர் டிகே சிவக்குமார், முதல்வர் சித்தராமையா இருவரும் சம்பவத்துக்கு மன்னிப்பு கேட்டுள்ளனர். ஆனால் எதிர்க்கட்சிகள் – பாஜக மற்றும் ஜனதா தளம் – ஆளும் காங்கிரஸை கடுமையாக விமர்சிக்கின்றன. நீதிமன்றமும் தற்போது அரசு மற்றும் கிரிக்கெட் நிர்வாகத்திடம் விளக்கம் கேட்டுள்ளது. பெங்களூரு போலீசாரும் சில அதிகாரிகளுக்கு எதிராக நடவடிக்கை எடுத்துள்ளது.
விராட் கோலி மீது தாக்குதலா ?
இந்த துயரச் சம்பவத்தில் அணி நிர்வாகத்துக்கும், அரசு தரப்பிற்கும் மேல் விசாரணை செல்வதாக இருந்தபோதிலும், சமூக வலைதளங்களில் #ArrestViratKohli என்ற ஹேஷ்டேக் ட்ரெண்டாகி பரவியது. இதன் பின்னணி திட்டமிட்ட வன்மம் எனக் கருதப்படுகிறது.
விராட் கோலி ஒருவரை குறிவைத்து தாக்குவது நியாயமற்றது. அவர் வெற்றியை கொண்டாட வந்த ஒரு வீரரே தவிர, நிகழ்ச்சி ஏற்பாட்டுக்குப் பொறுப்பாளி அல்ல. இதனை தவிர்த்து, உண்மையான பொறுப்பாளர்களை அடையாளம் காண வேண்டும் என்பதே தற்போது அதிகம் பேசப்படும் கோரிக்கையாக உள்ளது.
இந்துத்துவா ஆதரவாளர்கள் உள்ளிட்ட சிலர் கோலியை குறிவைத்து திட்டமிட்டு விமர்சிப்பது கவலையளிக்கிறது. இந்திய கிரிக்கெட்டுக்காக பல சாதனைகள் படைத்த கோலியை இப்படிப்பட்ட சூழ்நிலையில் குற்றவாளியாக ஆக்க முயற்சிப்பது நியாயமற்றது.