திண்டுக்கல் மாவட்டம் ஆத்தூர் தாலுகா, சித்தரேவு ஊராட்சிக்குட்பட்ட குப்பி நாயக்கன் பட்டியில் எழுந்தருளி அருள்பாலிக்கும் அருள்மிகு பகவதி அம்மன் திருக்கோவில் மகா கும்பாபிஷேகம் பக்திப் பெருக்குடன் மிகச் சிறப்பாக நடைபெற்றது. இக்கோவில் திருப்பணிகள் ஊர் பொதுமக்கள் மற்றும் பக்தர்களின் பேராதரவுடன் முழுமையடைந்ததைத் தொடர்ந்து, கும்பாபிஷேக விழா கணபதி ஹோமத்துடன் தொடங்கி பல்வேறு கால யாகசாலை பூஜைகளுடன் வெகுவிமரிசையாக நடைபெற்றது. புனித நதிகளில் இருந்து கொண்டு வரப்பட்ட தீர்த்தக் கலசங்களுக்குச் சிறப்புப் பூஜைகள் செய்யப்பட்டு, ஓதுவார்களின் வேத மந்திரங்கள் மற்றும் மேளதாளங்கள் முழங்க கலசங்கள் கோவிலைச் சுற்றி ஊர்வலமாக எடுத்து வரப்பட்டன.
விழாவின் சிகர நிகழ்ச்சியாக, யாகசாலையில் இருந்து புறப்பட்ட புனித நீர் கோபுரக் கலசத்தில் ஊற்றப்பட்டு மகா கும்பாபிஷேகம் நடைபெற்றது. அப்போது அங்கு திரண்டிருந்த ஆயிரக்கணக்கான பக்தர்கள் “ஓம் சக்தி, பராசக்தி” எனப் பக்தி முழக்கமிட்டு அம்மனைத் தரிசித்தனர். கலசத்தில் ஊற்றப்பட்ட புனித நீர் பக்தர்கள் மீது தெளிக்கப்பட்டது. அதனைத் தொடர்ந்து பகவதி அம்மனுக்குச் சிறப்பு அபிஷேக ஆராதனைகளும், மகா தீபாராதனையும் நடைபெற்றன. கும்பாபிஷேக விழாவை முன்னிட்டு குப்பி நாயக்கன் பட்டி மற்றும் சித்தரேவு ஊராட்சிப் பகுதிகள் விழாக்கோலம் பூண்டு காணப்பட்டன. விழாவிற்கு வருகை தந்த பக்தர்கள் அனைவருக்கும் திருக்கோவில் நிர்வாகம் சார்பில் அறுசுவை அன்னதானம் வழங்கப்பட்டது. இந்த ஆன்மீகப் பெருவிழாவிற்கான ஏற்பாடுகளைச் சித்தரேவு ஊராட்சி குப்பி நாயக்கன் பட்டி கிராம மக்கள் மற்றும் விழா கமிட்டியினர் ஒருங்கே இணைந்து மிகச் சிறப்பாகச் செய்திருந்தனர்.
