தமிழக முதலமைச்சர் மு.க.ஸ்டாலின் அவர்களின் வழிகாட்டுதலின்படி, அரசு வாகனப் பராமரிப்புத் துறையை நவீனமயமாக்கும் நோக்கில், போக்குவரத்துத் துறை அமைச்சர் சா.சி.சிவசங்கர் அவர்கள் பல்வேறு புதிய திட்டங்களைச் சென்னை தலைமைச் செயலகத்தில் இன்று தொடங்கி வைத்தார். குறிப்பாக, காஞ்சிபுரம், வேலூர், கடலூர் மற்றும் கோவை ஆகிய நான்கு முக்கிய நகரங்களில் செயல்படும் அரசு தானியங்கி பணிமனைகளை (Government Automobile Workshops) நவீனமயமாக்குதல் மற்றும் தரம் உயர்த்துதல் திட்டத்தின் கீழ், ரூ.40 லட்சம் மதிப்பீட்டில் மேம்படுத்தப்பட்ட வசதிகள் மக்கள் பயன்பாட்டிற்குக் கொண்டு வரப்பட்டுள்ளன.
இதனைத் தொடர்ந்து, 2025-26-ஆம் ஆண்டிற்கான போக்குவரத்துத் துறை மானியக் கோரிக்கை எண் 48-ன் கீழ் அறிவிக்கப்பட்ட புதிய முன்னெடுப்பாக, ரூ.30 லட்சத்து 165 செலவில் கோவை, திருநெல்வேலி, தஞ்சாவூர், வேலூர் மற்றும் காஞ்சிபுரம் ஆகிய ஐந்து பணிமனைகளுக்கு அதிநவீன ‘மின்னணு பழுது கண்டறியும் கருவிகள்’ (Electronic Diagnostic Tools) வழங்கப்பட்டுள்ளன. இதன் மூலம் நவீன ரக பிஎஸ்-6 (BS-VI) மற்றும் மின்சார வாகனங்களில் ஏற்படும் நுணுக்கமான தொழில்நுட்பக் கோளாறுகளை மிக விரைவாகவும் துல்லியமாகவும் கண்டறிந்து பழுது நீக்கம் செய்ய முடியும். இந்தத் தொழில்நுட்பப் புரட்சி அரசு வாகனங்களின் ஆயுட்காலத்தை அதிகரிப்பதுடன், பராமரிப்புச் செலவையும் கணிசமாகக் குறைக்கும் என எதிர்பார்க்கப்படுகிறது.
நிகழ்ச்சியின் ஒரு பகுதியாக, தமிழ்நாடு அரசுப் பணியாளர் தேர்வாணையம் (TNPSC) மூலம் இளநிலை உதவியாளர் பதவிக்குத் தேர்வு செய்யப்பட்ட இரண்டு நபர்களுக்குத் தனது கரங்களால் பணி நியமன ஆணைகளை அமைச்சர் வழங்கினார். விழாவில் போக்குவரத்துத் துறை அரசு முதன்மைச் செயலாளர் சுன்சோங்கம் ஜடக் சிரு மற்றும் அரசுத் துறை உயர் அதிகாரிகள் பலர் உடனிருந்து சிறப்பித்தனர். மாவட்டந்தோறும் அரசுப் பணிமனைகளைத் தரம் உயர்த்தும் இந்த நடவடிக்கைகள், தமிழகப் போக்குவரத்துத் துறையின் நிர்வாகத் திறனை அடுத்த கட்டத்திற்கு எடுத்துச் சென்றுள்ளது.
